काठमाडौं, कात्तिक ४। पार्टी नेतृत्वको निर्देशनअनुरूप राष्ट्रिय युवा सङ्घ नेपालले हाल तीनवटा प्रमुख जिम्मेवारी काम तीव्र गतिमा अगाडि बढाएको जनाएको छ।

सङ्घले ‘जेनजी आन्दोलन’जस्ता घटनालाई हिंसात्मक बनाउने गरी काम गरेको र त्यसमा संलग्न विदेशी वित्तीय स्रोत तथा गैरसरकारी संस्था (एनजिओ/आइएनजिओ)का नाम–ठेगाना सङ्कलन गर्ने प्रक्रिया सुरु गरेको हो ।  नेकपा एमाले पोलिटब्युरो सदस्य महेश बस्नेतका अनुसार राष्ट्रिय युवा सङ्घ नेपालले जेनजी आन्दोलन भड्काएर हिंसात्मक बनाउने मुख्य भूमिका खेलेका एनजिओ/आइएनजिओ मार्फत देशलाई बरबाद पार्ने, विदेशीसँग आर्थिक लाभ लिने सबैको नाम र विवरण सङ्कलन गर्ने काम सुरु भएको छ ।

’जेनजी आन्दोलन भड्काएर हिंसात्मक बनाउन मुख्य भूमिका खेलेका एनजिओ आइएनजिओ मार्फत देशलाई बरबाद पार्ने, विदेशीसँग आर्थिक लाभ लिने सबैको नाम र विवरण सङ्कलन गर्ने काम सुरु भएको छ, एक जनालाई मात्र लिफ्ट प्रयोग गर्ने अनुमति भएको काठमाडौंको एक सरकारी कार्यालयमा को-को बसेर देशको मुटु जलाउने योजना बनाए भन्ने डरलाग्दो सूचना पनि प्राप्त भएको छ’, बस्नेतले भन्नुभयो ।

भदौ २४ मा भएका तोडफोड तथा आगजनी, सरकारी/व्यक्तिगत सम्पत्ति नष्ट गर्ने घटनासँग सम्बन्धित व्यक्तिहरूको विषयमा हालसम्म ६ हजार ३ सय ४७ वटा भिडियो क्लिप र ती व्यक्तिहरूका व्यक्तिगत विवरण सङ्कलन गरिएको पनि उहाँले जानकारी दिनुभयो। ‘भदौ २४ गते सरकारी र व्यक्तिगत सम्पत्ति तथा प्रहरी चौकी नष्ट गर्ने र तोडफोड गर्ने व्यक्तिहरूको विषयमा अहिलेसम्म ६ हजार ३ सय ४७ वटा भिडियो क्लिप र उनीहरूको व्यक्तिगत विवरण प्राप्त भएको छ, यसरी प्राप्त विवरणहरू विवरण बैङ्कमा राखिएको छ, अन्य विवरण पठाउन सबैमा अनुरोध गर्दछु’, बस्नेतले भन्नुभयो ।

देश जलाएर बनेको अहिलेको सरकारले सरकारी र व्यक्तिगत सम्पत्तिमा आगजनी गर्ने र सुरक्षाकर्मीलाई मार्नेहरूको संरक्षण गर्ने नीति लिएको भन्दै ती ती अपराधीहरूलाई उन्मुक्ति नदिने बस्नेतले प्रष्ट पार्नुभयो । उहाँले एमालेले देश र जनताको रक्षा गर्ने दाबी गर्दै आगामी दिनहरूमा थप कदम चालिने बताउनुभयो ।

बस्नेतले राष्ट्रिय युवा संघ नेपालले देशभरका प्रत्येक टोलमा डिजिटल जेनेरेसन फोर्स (DG- Force) वा टोल सुरक्षा समूह गठन गर्ने कार्यक्रम अघि बढाइएको जानकारी पनि दिनुभयो। उहाँका अनुसार यी समूहहरूले स्थानीय स्तरमा अपराध नियन्त्रणमा सहयोग गर्ने, प्रहरीको मनोबल बढाउने र समुदायमा स्वतन्त्र निगरानीको एउटा माध्यम बन्ने छन्। ‘तिनले प्रहरीको मनोबल बढाउने र स्थानीय तवरमा भएका अपराध नियन्त्रणका लागि सहयोग गर्ने छ,’ उहाँले भन्नुभयो ।