काठमाडौं, वैशाख १९ ।  सञ्चार तथा सूचना प्रविधिमन्त्री मन्त्री विक्रम तिमिल्सिना ले सूचना प्रविधि अब विकल्प नभई आधारभूत आवश्यकता बनिसकेको बताउनुभएको छ ।

राष्ट्रिय सूचना तथा सञ्चार प्रविधि दिवस २०८३ का अवसरमा शुभकामना सन्देश जारी गर्दै तिमिल्सिनाले सुशासन, सेवा प्रवाह, आर्थिक विकास, उद्यमशीलता तथा नागरिक सशक्तीकरणका लागि सूचना प्रविधिको भूमिका अपरिहार्य रहेको उल्लेख गर्नु भएकाे छ । उहाँले सूचना तथा सञ्चार प्रविधि क्षेत्रमा क्रियाशील उद्यमी, नवप्रवर्तक, प्राविधिक जनशक्ति, ‘स्टार्टअप’ समुदाय, निजी क्षेत्र, अनुसन्धानकर्ता, विद्यार्थी तथा सम्पूर्ण सरोकारवालामा शुभकामना व्यक्त  गर्दै नेपाल सरकार ‘डिजिटल नेपाल’ निर्माणको लक्ष्यलाई व्यवहारमा उतार्दै सार्वजनिक सेवा प्रणालीलाई थप सरल, पारदर्शी, उत्तरदायी र नागरिकमैत्री बनाउने दिशामा अघि बढिरहेको जानकारी दिनुभएकाे छ।

उहाँका अनुसार मन्त्रालयले आगामी दशक लक्षित दीर्घकालीन सूचना प्रविधि रणनीति निर्माण तथा डिजिटल सार्वजनिक पूर्वाधार विकासलाई उच्च प्राथमिकतामा राखेको छ । ‘नागरिक एपलाई थप सुदृढ र प्रभावकारी बनाउँदै नागरिकले राज्यका अत्यावश्यक सेवाहरू एउटै डिजिटल प्लेटफर्ममार्फत सहज रूपमा प्राप्त गर्न सक्ने व्यवस्था विस्तार गरिँदैछ,’ उहाँले सन्देशमा उल्लेख गर्नुभएको छ ।

उहाँले नेपाललाई डिजिटल नवप्रवर्तन, सूचना प्रविधि सेवा, ‘डेटा’ अर्थतन्त्र तथा ‘आर्टिफिसियल इन्टेलिजेन्स’ (एआई) को क्षेत्रीय केन्द्रका रूपमा विकास गर्ने लक्ष्य राखिएको बताउनुभयो । सोही उद्देश्यअनुसार राष्ट्रिय एआई नीति, राष्ट्रिय साइबर सुरक्षा नीति तथा सूचना प्रविधिसम्बन्धी कानुनी र संस्थागत संरचनाको सुधारलाई तीव्रता दिइएको उहाँको भनाइ छ ।

मन्त्री तिमिल्सिनाका अनुसार देशभर उच्च गतिको ‘ब्रडब्यान्ड इन्टरनेट’ विस्तार, सरकारी डाटा सेन्टर तथा ‘डिजास्टर रिकभरी’ प्रणाली सुदृढीकरण, डिजिटल साक्षरता अभिवृद्धि तथा दक्ष सूचना प्रविधि जनशक्ति उत्पादनमार्फत डिजिटल विभाजन न्यूनीकरण गर्दै समावेशिता सुनिश्चित गर्ने दिशामा सरकार प्रतिबद्ध रहेको छ ।

उहाँले सूचना प्रविधि क्षेत्रलाई रोजगारी सिर्जना, युवा प्रतिभा प्रवर्द्धन, स्टार्टअप विकास तथा राष्ट्रिय अर्थतन्त्रको नयाँ वृद्धि इन्जिनका रूपमा स्थापित गर्ने लक्ष्य लिइएको पनि उल्लेख गर्नुभयो । ‘डिजिटल रूपान्तरण सरकार मात्रको प्रयासले सम्भव हुँदैन । यस अभियानमा निजी क्षेत्र, प्राज्ञिक संस्था, विकास साझेदार, सञ्चारमाध्यम, प्रविधि समुदाय तथा सम्पूर्ण नागरिकको सक्रिय सहकार्य अपरिहार्य छ,’ उहाँले भन्नुभएको छ ।

समृद्ध, आधुनिक र डिजिटल नेपाल निर्माणका लागि सबैलाई हातेमालो गर्न उहाँले आह्वान गर्नुभएको छ ।