आज बसेको नेपाल सरकारको मन्त्रिपरिषद् बैठकले बर्खे धान बालीका लागि मोटो धानको न्यूनतम समर्थन मूल्य प्रतिक्विन्टल ३ हजार ६ सय ६० रुपैयाँ र मध्यम धानको ३ हजार ८ सय ६० रुपैयाँ तोक्ने निर्णय गरेको हो ।

सरकारका प्रवक्ता सस्मित पोखरेलका अनुसार बैठकले उक्त मूल्य निर्धारणसँगै अन्य निर्णयहरू पनि गरेको छ ।

बैठकले नेपाल–चीन जोड्ने विद्युत् प्रसारण लाइन आयोजना चिलिमे–केरुङ कार्यान्वयनका लागि चीन सरकारलाई पठाउने प्रतिउत्तर पत्र स्वीकृत गर्ने निर्णय गरेको छ ।

त्यसै गरी सहकारी क्षेत्रमा भएको बेथितिसम्बन्धी जाँचबुझ आयोगको प्रतिवेदन सार्वजनिक गर्ने निर्णयसमेत मन्त्रिपरिषद्ले गरेको छ ।

यस्तै, नेपाल नागरिक उड्डयन प्राधिकरणको महानिर्देशकमा सहसचिव मुकेश डङ्गोललाई नियुक्त गर्ने निर्णय पनि बैठकले गरेको प्रवक्ता पोखरेलले जानकारी दिनुभयो ।