काठमाडौं जेठ १८ । कांग्रेस सभापति गगन थापाले प्रधानमन्त्री बालेन्द्र शाह बालेनले आइतबार प्रतिनिधिसभामा ‘भारतको जग्गा नेपालले मिचेको’ भन्ने विषय निन्दनीय रहेको टिप्पणी गर्नुभएको छ ।

सोमबार कांग्रेसको नीति, अनुसन्धान तथा प्रशिक्षण प्रतिष्ठानद्वारा आयोजित कार्यक्रममा बोल्दै प्रमुख प्रतिपक्षी दलका सभापति थापाले प्रधानमन्त्री बालेनले बोलेको विषयमा आपत्ति जनाउनु भएको हो ।

‘हिजो प्रधानमन्त्रीले एउटा कुरा बोल्नुभयो, नेपालको सार्वभौमिकता, नेपालको भौगोलिक अखण्डता र नेपालको राष्ट्रिय सुरक्षासँग जोडिएको यस्तो संवेदनशील विषयमा सम्माननीय प्रधानमन्त्री ज्युले राखेको विषय निन्दनीय छ । घोर आपत्तिजनक छ,’ थापाले भन्नुभयो, ‘र, नेपाली कांग्रेस पार्टीले यसको सम्पूर्ण रूपमा यसको विरोध गर्छ । हामीले यो कुरा प्रस्ट भनेका छौं ।’

उहाँले सीमा विवादजस्तो संवेदनशील विषयमा देशहरूका निश्चित अडान हुने प्रष्ट पार्नुभयो । ‘देशका अडान हुन्छन्, त्यसका पछाडि केही प्रमाण, कथन हुन्छन् । प्रधानमन्त्रीको अभिव्यक्तिले त्यसलाई कमजोर बनाएको छ,’ थापाको भनाई छ । छिमेकीसँग कूटनीतिक माध्यमबाट समाधान गर्नसकिने सम्भावनालाई प्रधानमन्त्री बालेनको अभिव्यक्तिले क्षीण बनाएको भन्दै थापाले कडा आपत्ति पनि जनाउनु भयो ।