रामेछाप, असार ११ । रामेछाप जिल्लाका सबै आठ स्थानीय तहले आगामी आर्थिक वर्ष २०८३/०८४ का लागि नीति, कार्यक्रम तथा बजेट सार्वजनिक गरेका छन्। जिल्लाको मन्थली नगरपालिका, रामेछाप नगरपालिका तथा लिखुतामाकोशी, गोकुलगंगा, उमाकुण्ड, दोरम्बा शैलुङ, सुनापति र खाँडादेवी गाउँपालिकाले शिक्षा, स्वास्थ्य, कृषि, पर्यटन, पूर्वाधार विकास, रोजगारी सिर्जना तथा सुशासनलाई केन्द्रमा राख्दै बजेट ल्याएका हुन्।

स्थानीय तहहरूले सार्वजनिक गरेका बजेट तथा कार्यक्रमअनुसार विकास निर्माण, आधारभूत सेवा विस्तार, कृषि आधुनिकीकरण, पर्यटन प्रवर्द्धन र उद्यमशीलता विकासलाई विशेष प्राथमिकता दिइएको छ। अधिकांश स्थानीय तहले अधुरा तथा बहुवर्षीय योजनाको निरन्तरता, विपद् व्यवस्थापन, खानेपानी विस्तार तथा युवा लक्षित कार्यक्रमलाई पनि प्राथमिकताका साथ समेटेका छन्।

जिल्लामध्ये सबैभन्दा ठूलो बजेट मन्थली नगरपालिकाले ल्याएको छ। नगरपालिकाले आगामी आर्थिक वर्षका लागि १ अर्ब ३ करोड २० लाख रुपैयाँको बजेट सार्वजनिक गरेको छ। नगर प्रमुख लव श्रेष्ठले शिक्षा, स्वास्थ्य, कृषि आधुनिकीकरण, युवा उद्यमशीलता तथा पर्यटन प्रवर्द्धनलाई प्रमुख प्राथमिकतामा राखिएको जानकारी दिनुभयो।

नगरपालिकाले ‘घरदैलोमा स्वास्थ्यकर्मी’ अभियान सञ्चालन गर्ने, १४ वटै वडामा योग केन्द्र स्थापना गर्ने, किसान परिचयपत्र वितरण गर्ने तथा स्थानीय कृषि उपजको काठमाडौंसम्म बजारीकरण गर्ने कार्यक्रम अघि सारेको छ।

रामेछाप नगरपालिकाले ८० करोड ८६ लाख ५० हजार रुपैयाँको बजेट सार्वजनिक गर्दै शिक्षा, स्वास्थ्य, कृषि, पर्यटन, खानेपानी तथा पूर्वाधार विकासलाई प्राथमिकतामा राखेको छ। नगर प्रमुख लवश्री न्यौपानेले सेवा प्रवाह सुधार, सुशासन प्रवर्द्धन, विपद् व्यवस्थापन तथा नागरिकलाई घरदैलोमै सेवा उपलब्ध गराउन एकीकृत घुम्ती शिविर सञ्चालन गर्ने नीति लिइएको बताउनुभयो।

गाउँपालिकामध्ये लिखुतामाकोशी गाउँपालिकाले ७० करोड ६४ लाख २८ हजार रुपैयाँको बजेट ल्याएको छ। गाउँपालिकाले पूर्वाधार विकास क्षेत्रमा मात्र १७ करोड ३८ लाख रुपैयाँ विनियोजन गरेको छ। शिक्षा, स्वास्थ्य, कृषि, पर्यटन, रोजगार तथा खानेपानी क्षेत्रलाई प्राथमिकतामा राख्दै आर्थिक तथा सामाजिक विकासका कार्यक्रम अघि बढाइएको गाउँपालिकाले जनाएको छ।

उमाकुण्ड गाउँपालिकाले आगामी आर्थिक वर्षका लागि ६३ करोड ५१ लाख ९६ हजार रुपैयाँको बजेट सार्वजनिक गरेको छ। गाउँपालिकाले शिक्षा, स्वास्थ्य, कृषि तथा पशुपालन, उद्यम विकास, खेलकुद र पर्यटन क्षेत्रलाई प्राथमिकतामा राखेको छ। आधुनिक कभर्डहल निर्माण, उद्यमशीलता तालिम, वैदेशिक रोजगारीबाट फर्किएका युवाका लागि स्वरोजगार कार्यक्रम तथा टोल–टोलमा स्वास्थ्य सेवा विस्तार गर्ने योजना समेटिएको छ।

गोकुलगंगा गाउँपालिकाले ६३ करोड ५ लाख २० हजार रुपैयाँको बजेट ल्याउँदै अधुरा आयोजनाको निरन्तरता, ग्रामीण पूर्वाधार, खानेपानी, शिक्षा, स्वास्थ्य, विपद् व्यवस्थापन तथा डिजिटल प्रविधि विकासलाई प्राथमिकता दिएको छ। गाउँपालिकाले उत्पादन वृद्धि, रोजगारी सिर्जना तथा आधारभूत सेवाको पहुँच विस्तारलाई आगामी वर्षको प्रमुख लक्ष्य बनाएको जनाएको छ।

खाँडादेवी गाउँपालिकाले ६० करोड ५७ लाख २१ हजार रुपैयाँको बजेट सार्वजनिक गरेको छ। गाउँपालिकाले निर्माणाधीन खाँडादेवी अस्पतालका लागि ५५ लाख रुपैयाँ, खाँडादेवी मन्दिरसम्म सडक निर्माणका लागि ५० लाख रुपैयाँ तथा निर्माणाधीन गुम्बाका लागि ५० लाख रुपैयाँ विनियोजन गरेको छ। शिक्षा, स्वास्थ्य, कृषि, खानेपानी, पर्यटन तथा पूर्वाधार विकासलाई प्राथमिकतामा राख्दै स्थानीय स्रोत–साधनको अधिकतम उपयोगमार्फत रोजगारी सिर्जना गर्ने लक्ष्य लिइएको छ।

दोरम्बा शैलुङ गाउँपालिकाले ६० करोड १४ लाख ८३ हजार रुपैयाँको बजेट ल्याएको छ। गाउँपालिकाले शिक्षा, स्वास्थ्य, कृषि, पर्यटन, उद्यम विकास, पूर्वाधार निर्माण तथा प्रविधिमैत्री सेवा विस्तारलाई प्राथमिकतामा राखेको छ। सडक स्तरोन्नति, कृषि उत्पादन वृद्धि, स्वास्थ्य सेवा सुधार तथा पर्यटन प्रवर्द्धनलाई केन्द्रमा राखेर कार्यक्रम सञ्चालन गरिने जनाइएको छ।

सुनापति गाउँपालिकाले ५४ करोड ७० लाख ३ हजार रुपैयाँको बजेट सार्वजनिक गर्दै सुशासन, पूर्वाधार विकास, स्वास्थ्य सेवा विस्तार तथा विपद् व्यवस्थापनलाई प्राथमिकतामा राखेको छ। विशेषगरी बाढी–पहिरोको उच्च जोखिममा रहेका बस्तीहरूको व्यवस्थापन तथा प्रभावित परिवारलाई राहत उपलब्ध गराउने कार्यक्रमलाई विशेष महत्व दिइएको छ।

जिल्लाका सबै स्थानीय तहका नीति तथा कार्यक्रममा गुणस्तरीय शिक्षा, सहज स्वास्थ्य सेवा, कृषि उत्पादन वृद्धि, पर्यटन प्रवर्द्धन, युवा उद्यमशीलता विकास, रोजगारी सिर्जना, खानेपानी विस्तार तथा पूर्वाधार निर्माणलाई साझा प्राथमिकताका रूपमा समेटिएको देखिन्छ। संघीय शासन प्रणाली कार्यान्वयनको अनुभवसँगै सेवा प्रवाह सुधार, आर्थिक विकास र नागरिकको जीवनस्तर उकास्ने लक्ष्यसहित स्थानीय तहहरूले आगामी आर्थिक वर्षको बजेट तथा कार्यक्रम सार्वजनिक गरेका हुन्।

आठवटै स्थानीय तहले सार्वजनिक गरेको बजेटको कुल आकार करिब ५ अर्ब ५६ करोड ७० लाख रुपैयाँ पुगेको छ।