मन्त्री पौडेलले बागमती प्रदेशमा नेपाली कांग्रेससँगको गठबन्धन औपचारिक रूपमा अझै कायम रहेको बताउनुभयो। उहाँले केन्द्रमा राजनीतिक छलफल भइरहे पनि प्रदेश तहमा कुनै नयाँ निर्देशन प्राप्त नभएको उल्लेख गर्नुभयो। “तत्कालका लागि हामी सरकारका नियमित काममै केन्द्रित हुन्छौँ, पार्टीले जे निर्णय गर्छ, त्यसैअनुसार अघि बढ्छौँ,” उहाँले भन्नुभयो।

उहाँले मन्त्रालय पुनर्संरचना, विनाविभागीय मन्त्रीहरूको जिम्मेवारी तथा सरकारको आगामी स्वरूपबारे पनि एक–दुई दिनभित्र स्पष्टता आउने विश्वास व्यक्त गर्नुभयो।

एमाले बागमती प्रदेश संसदीय दलका नेता जगन्नाथ थपलियाले बदलिँदो राष्ट्रिय राजनीतिक अवस्थालाई ध्यानमा राख्दै हतारमा निर्णय नगर्ने निष्कर्षमा पार्टी पुगेको बताउनुभयो। “हरेक दिन राजनीतिक परिस्थिति बदलिरहेको छ, त्यसैले तत्काल सरकार छाड्ने निर्णय गरिएको छैन, केन्द्रको निर्देशन, अन्य दलसँगको संवाद र विकसित राजनीतिक अवस्थाको मूल्याङ्कनपछि मात्रै अन्तिम निर्णय हुन्छ,” उहाँले भन्नुभयो।

केन्द्रीय तहमा नेपाली कांग्रेस र एमालेबीचको सत्ता सहकार्य अन्त्य भएपछि बागमती प्रदेश सरकारमा रहेका एमालेका मन्त्रीहरूले सामूहिक राजीनामा दिने तयारी गरेका थिए। तर, अन्तिम समयमा केन्द्रबाट तत्काल राजीनामा नदिन निर्देशन आएपछि राजीनामा प्रक्रिया रोकिएको स्रोतहरूको भनाइ छ।

हाल बागमती प्रदेश सरकारमा एमालेबाट मधुसुदन पौडेल, डा. दिनेशचन्द्र देवकोटा, जयराम थापा, भरतबहादुर केसी, किरण थापा मगर र विन्दु श्रेष्ठ मन्त्रीका रूपमा कार्यरत हुनुहुन्छ।केन्द्रमा सत्ता समीकरण फेरिए पनि बागमती प्रदेश सरकारको भविष्यबारे भने अझै स्पष्ट निर्णय सार्वजनिक भएको छैन। विभिन्न राजनीतिक दलबीच सम्भावित नयाँ समीकरणबारे छलफल जारी रहे पनि त्यसले प्रदेश सरकारको स्वरूपमा कस्तो प्रभाव पार्ने भन्ने विषय केही दिनमै स्पष्ट हुने अपेक्षा गरिएको छ।