काठमाडौं, साउन २८ । चीनले जीपीएस वा बेइडो जस्ता भूउपग्रह नेभिगेसन प्रणाली जाम भए पनि हाइपरसोनिक क्षेप्यास्त्रलाई ताराको अवस्थिति पहिचान गरी मार्गनिर्देशन गर्न सक्ने प्रविधि विकास गरेको दाबी गरेको छ ।

चिनियाँ वैज्ञानिकहरूले हाइपरसोनिक गतिमा उड्ने हतियारका लागि ‘स्टार सेन्सर’मा आधारित नेभिगेसन प्रणाली विकास गरेको जनाइएको छ । यो प्रविधिले ध्वनिको गतिभन्दा पाँच गुणा वा त्यसभन्दा बढी गतिमा उड्ने हाइपरसोनिक वाहनलाई ताराको अवस्थिति आधार बनाएर दिशा र स्थान पहिचान गर्न सहयोग गर्ने उद्देश्य राखेको छ ।

साउथ चाइना मर्निङ पोस्टका अनुसार गुआङडोङ एरोस्पेस रिसर्च एकेडेमीको नेतृत्वमा सञ्चालित परियोजनाले विशेषज्ञ समीक्षा पार गरेको छ । अनुसन्धानकर्ताहरूले हाइपरसोनिक उडानका क्रममा उत्पन्न हुने अत्यधिक ताप र प्लाज्माका कारण ताराको प्रकाश पहिचानमा आउने समस्या समाधान गर्ने प्रयास गरेका हुन् ।

हाइपरसोनिक वाहन वरिपरि उच्च तापक्रमको ‘प्लाज्मा सिथ’ बन्ने भएकाले ताराबाट आउने कमजोर प्रकाश पहिचान गर्न कठिन हुन्छ । चिनियाँ अनुसन्धानकर्ताले यसका लागि विशेष सफ्टवेयर र सेन्सर विकास गरेको बताएका छन् ।

उनीहरूका अनुसार परीक्षणमा विकिरण अवरोध नभएको अवस्थामा सेन्सरले ९९ प्रतिशतभन्दा बढी अवस्थामा ताराको ढाँचा पहिचान गरेको थियो । अत्यधिक विकिरण अवरोध भएको अवस्थामा पनि पहिचानदर ८० प्रतिशतभन्दा माथि रहेको दाबी गरिएको छ ।

यस प्रविधिले हाइपरसोनिक हतियारलाई भूउपग्रहमा आधारित नेभिगेसन प्रणालीमा निर्भरता घटाउन सक्ने सम्भावना देखिए पनि वास्तविक सैन्य प्रयोगमा यसको प्रभावकारिता थप परीक्षणबाट मात्रै पुष्टि हुने बताइएको छ ।