हेटौँडा, असोज ३ । बागमती प्रदेशका मुख्यमन्त्री किरण थापा मगरले संविधानको सफलता यसको घोषणामा मात्र नभई प्रभावकारी कार्यान्वयन र नागरिकले दैनिक जीवनमा त्यसको प्रत्यक्ष अनुभूति गर्न पाउने अवस्थाबाट पुष्टि हुनुपर्ने बताउनुभएको छ।

संविधान दिवस तथा राष्ट्रिय दिवस, २०८३ का अवसरमा आज हेटौँडामा आयोजित विशेष समारोहलाई सम्बोधन गर्दै मुख्यमन्त्री थापा मगरले सार्वजनिक कार्यालयबाट सहज सेवा, समाजमा न्याय र सुरक्षा, युवाका लागि शिक्षा तथा रोजगारी, किसानका उत्पादनको उचित मूल्य, उद्यमीका लागि अनुकूल वातावरण र विपन्न नागरिकका लागि राज्यको संरक्षण सुनिश्चित हुनुपर्ने बताउनुभयो।

उहाँले प्रशासनिक ढिलासुस्ती, विकास आयोजनाको न्यून प्रगति, बेरोजगारी, युवा पलायन, भ्रष्टाचारप्रतिको नागरिक चिन्ता तथा सार्वजनिक संस्थाप्रतिको घट्दो विश्वासलाई साझा चुनौतीका रूपमा औँल्याउनुभयो। यी समस्या आरोप–प्रत्यारोपबाट नभई जिम्मेवारीबोध, सहकार्य र परिणाममुखी कार्यबाट समाधान गर्नुपर्ने उहाँको भनाइ थियो।

मुख्यमन्त्री थापा मगरले सङ्घीयताको प्रभावकारी कार्यान्वयनका लागि सङ्घ, प्रदेश र स्थानीय तहबीच प्रभावकारी समन्वय आवश्यक रहेको बताउनुभयो। प्रदेश सरकार नागरिक र सङ्घीय संरचनाबीचको महत्त्वपूर्ण सेतु भएको उल्लेख गर्दै उहाँले संविधानले प्रदेशलाई प्रदान गरेका अधिकारको कार्यान्वयन, आवश्यक कानून निर्माण तथा पर्याप्त स्रोत र जनशक्तिको व्यवस्था हुनुपर्नेमा जोड दिनुभयो। “अधिकार, जिम्मेवारी र स्रोतबीच उचित सन्तुलन कायम गर्नु सङ्घीयता सुदृढीकरणको आधार हो,” उहाँले भन्नुभयो।

उहाँले बागमती प्रदेशमा कृषि, उद्योग, पर्यटन, ऊर्जा, शिक्षा, स्वास्थ्य, सञ्चार, प्रविधि तथा ऐतिहासिक र सांस्कृतिक सम्पदाका प्रशस्त सम्भावना रहेको बताउँदै ती सम्भावनाको उपयोगसँगै तीव्र सहरीकरण, वातावरणीय प्रदूषण, विपद् जोखिम, क्षेत्रीय असमानता र सार्वजनिक सेवामाथिको बढ्दो मागजस्ता चुनौती सम्बोधन गर्नुपर्ने उल्लेख गर्नुभयो।

प्रदेश सरकार नागरिकको अपेक्षाअनुसार जिम्मेवार, पारदर्शी र परिणाममुखी रूपमा अघि बढ्न प्रतिबद्ध रहेको बताउँदै मुख्यमन्त्री थापा मगरले प्रशासनलाई सरल, प्रविधिमैत्री र उत्तरदायी बनाउने, सार्वजनिक खर्चमा अनुशासन कायम गर्ने तथा समयमै गुणस्तरीय आयोजना सम्पन्न गर्ने विषयलाई प्राथमिकता दिइने जानकारी दिनुभयो।

त्यस्तै, कानूनको शासन, शान्ति सुरक्षा, नागरिक अधिकारको संरक्षण र विपद् उत्थानशील पूर्वाधार निर्माणलाई प्रदेश सरकारले प्राथमिकतामा राखेको उहाँले बताउनुभयो।

मुख्यमन्त्री थापा मगरले सहकारी क्षेत्रमा देखिएका समस्या समाधान गर्दै सर्वसाधारण बचतकर्ताको हित संरक्षण गर्नु प्रदेश सरकारको महत्त्वपूर्ण जिम्मेवारी भएको बताउनुभयो। सहकारी संस्थामा प्रभावकारी नियमन, सुशासन, पारदर्शिता र उत्तरदायित्व सुनिश्चित गर्ने तथा समस्याग्रस्त सहकारीका पीडित बचतकर्तालाई न्याय दिलाउने कार्यलाई प्राथमिकताका साथ अघि बढाइने उहाँको भनाइ थियो।

युवालाई स्वदेशमै अवसर उपलब्ध गराउन कृषि, पर्यटन, उद्योग, सूचना प्रविधि, सीप विकास र उद्यमशीलतालाई प्रोत्साहन गरिने पनि उहाँले बताउनुभयो। शिक्षा र स्वास्थ्य सेवामा गुणस्तर, पहुँच र समानता कायम गर्दै महिला, बालबालिका, ज्येष्ठ नागरिक, अपाङ्गता भएका व्यक्ति, दलित तथा पछाडि परेका समुदायको सम्मानजनक जीवन र अर्थपूर्ण सहभागितामा जोड दिइने उहाँले उल्लेख गर्नुभयो।

मुख्यमन्त्री थापा मगरले संविधानको कार्यान्वयन सरकारको मात्र जिम्मेवारी नभएको स्पष्ट पार्दै राजनीतिक दल, जनप्रतिनिधि, राष्ट्रसेवक कर्मचारी, निजी क्षेत्र, नागरिक समाज, सञ्चारजगत् र प्रत्येक नागरिकको भूमिका महत्त्वपूर्ण रहेको बताउनुभयो। लोकतन्त्रमा विचार फरक हुन सक्ने भए पनि राष्ट्रहित, संविधानको संरक्षण र नागरिक कल्याणका विषयमा साझा समझदारी र सहकार्य आवश्यक रहेको उहाँको भनाइ थियो।

मुख्यमन्त्री थापा मगरले नेपालको संविधान राज्य सञ्चालनको कानूनी दस्तावेज मात्र नभई नेपाली जनताका अधिकार, आकाङ्क्षा र साझा भविष्यको आधार भएको बताउनुभयो।

संविधानले सङ्घीय लोकतान्त्रिक गणतन्त्र, समावेशिता, सामाजिक न्याय, मानव अधिकार, प्रेस स्वतन्त्रता, विधिको शासन र स्वतन्त्र न्यायपालिकालाई संस्थागत गरेको उल्लेख गर्दै उहाँले प्रत्येक नागरिकलाई सम्मानपूर्वक बाँच्न, शिक्षा, स्वास्थ्य, रोजगारी, सामाजिक सुरक्षा र न्यायमा पहुँच प्राप्त गर्ने आधार संविधानले प्रदान गरेको बताउनुभयो।

संविधान जारी भएपछि सङ्घ, प्रदेश र स्थानीय तहसहितको सङ्घीय शासन प्रणाली संस्थागत भएको तथा तीनै तहमा जनप्रतिनिधिमूलक संस्था सञ्चालनमा रहेको उहाँले उल्लेख गर्नुभयो। नागरिकका धेरै सेवा स्थानीय तहसम्म पुगेको र प्रदेशहरूले आफ्नो आवश्यकता तथा विशेषताअनुसार नीति, कानून, योजना र कार्यक्रम निर्माण गरिरहेको उहाँको भनाइ थियो।

उहाँले लोकतन्त्र, नागरिक स्वतन्त्रता र राष्ट्रिय हितका लागि जीवन उत्सर्ग गर्ने ज्ञात–अज्ञात सहिदप्रति सम्मान व्यक्त गर्नुभयो। विभिन्न लोकतान्त्रिक आन्दोलनका घाइते, बेपत्ता तथा योगदानकर्ताप्रति पनि उहाँले सम्मान प्रकट गर्नुभयो।

समारोहमा प्रस्तुत सांस्कृतिक झाँकी, निबन्ध प्रतियोगिता तथा मैत्रीपूर्ण खेलकुदले बागमती प्रदेशको विविधता, सिर्जनशीलता, सहकार्य र सद्भावलाई उजागर गरेको भन्दै मुख्यमन्त्री थापा मगरले विद्यार्थी, कलाकार, खेलाडी तथा सहभागी संस्थालाई धन्यवाद तथा बधाई दिनुभयो।

सम्बोधनका क्रममा मुख्यमन्त्री थापा मगरले संविधानप्रति प्रदेश सरकारको पूर्ण निष्ठा दोहोर्‍याउँदै नागरिक अधिकारको संरक्षण, विधिको शासन, सुशासन, सामाजिक न्याय, समावेशी विकास तथा सुरक्षित र समृद्ध प्रदेश निर्माणका लागि इमानदारीपूर्वक काम गर्ने प्रतिबद्धता व्यक्त गर्नुभयो।

कार्यक्रममा प्रमुख अतिथिका रूपमा उपस्थित प्रदेश प्रमुखप्रति कृतज्ञता व्यक्त गर्दै उहाँले समारोहको तयारी तथा व्यवस्थापनमा योगदान पुर्‍याउने मन्त्रालय, सरकारी निकाय, सुरक्षा निकाय, राष्ट्रसेवक कर्मचारी तथा सहयोगी सबैप्रति आभार व्यक्त गर्नुभयो।

 विपद्पीडितको दुःखमा प्रदेश सरकार साथमा

मुख्यमन्त्री थापा मगरले यस वर्षको संविधान दिवस मनाइरहँदा भोटेकोशी तथा त्रिशूली नदी प्रणालीमा आएको जलप्रलयबाट भएको मानवीय तथा भौतिक क्षतिलाई बिर्सन नसकिने बताउनुभयो।

जलप्रलयमा ज्यान गुमाउने नागरिकप्रति भावपूर्ण श्रद्धाञ्जली अर्पण गर्दै उहाँले शोकसन्तप्त परिवारजनप्रति समवेदना तथा घाइतेहरूको शीघ्र स्वास्थ्यलाभको कामना गर्नुभयो। प्रभावित परिवार तथा समुदायको दुःखमा बागमती प्रदेश सरकार साथमा रहेको विश्वाससमेत उहाँले दिलाउनुभयो। विपद्का समयमा खोज, उद्धार, उपचार र राहतमा खटिएका सुरक्षा निकाय, स्वास्थ्यकर्मी, राष्ट्रसेवक कर्मचारी, स्थानीय तह, जनप्रतिनिधि, स्वयंसेवक, निजी क्षेत्र, सञ्चारकर्मी तथा सहयोगी सबैप्रति उहाँले धन्यवाद व्यक्त गर्नुभयो।

प्रभावित क्षेत्रमा सुरक्षित बसोबास, अत्यावश्यक सेवा सञ्चालन, क्षतिग्रस्त पूर्वाधारको पुनर्निर्माण तथा नागरिकको जीविकोपार्जन पुनःस्थापनाका लागि सङ्घीय सरकार र स्थानीय तहसँग समन्वय गरी पुनर्निर्माण तथा पुनर्लाभका कामलाई प्राथमिकताका साथ अघि बढाइने उहाँले बताउनुभयो।