चितवन, पुष १३
नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले संस्थागत रुपमा काम गरेर अझै उत्साहपुर्ण वातावरण बनाइने घोषणा गर्नुभएको छ । उहाले सरकारले आउदो तीन वर्षमा अझै उच्चस्तरको काम गर्ने बताउनु भयो ।
गृहजिल्ला चितवनको इच्छाकामना गाउँपालिका कमिटीको आइतबार शपथ ग्रहणमा बोल्दै अध्यक्ष प्रचण्डले संस्थागत किसिमले कार्यक्रम चलाइसकेपछि उत्साहपूर्ण वातावरण सिर्जना हुने बताउनु भयो । उहाले आगामी तीन वर्षको सरकार र पार्टीको कामले नेकपा एक्लैले दुई तिहाइ मत ल्याउने वातावरण सिर्जना गर्ने दाबी समेत गर्नुभयो । “आउने दिनमा संस्थागत किसिमले कार्यक्रम चलाइसकेपछि उत्साहपूर्ण वातावरण सिर्जना गर्न सकिन्छ,” उहाले भन्नुभयो ।
अध्यक्ष प्रचण्डले कम्युनिस्ट पार्टीले मात्रै राष्ट्रिय स्वाधीनता, भौगोलिक अखण्डताको रक्षा र सम्वर्धन गर्न सक्ने दाबी गर्नुभयो । त्यस्तै नेकपाले मात्रै विकास र समृद्धिको राष्ट्रिय आकांक्षाको सम्बोधन गर्न सक्ने बताउनु भयो । “यो स्थापित तथ्य हो । अझै बढी मिहनेत गरेर आउने दिनमा यसलाई स्थापित गर्नुपर्छ,” उहाको भनाई छ ।
कार्यक्रममा अध्यक्ष प्रचण्डले कालापानी, लिम्पियाधुरा, लिपुलेकलगायतका भूमि भारतले आफ्नो राजनीतिक नक्सामा समेटेको कुरामा सरकार, पार्टी गम्भीर रहेको बताउँदै एक इन्च भूमि पनि नछोडिने प्रष्टीकरण दिनुभयो । उहाले यो विषय कूटनीतिक तरिकाले समाधान गरिने पनि जानकारी दिनुभयो ।
प्रतिक्रिया दिनुहोस्