कञ्चनपुर, पुष २०
नेकपाका वरिष्ठ नेता एवं पूर्व प्रधानमन्त्री माधवकुमार नेपालले सिमा विवाद समाधानका लागि भारतले पनि पहल गर्नुपर्ने बताउनु भएको छ । उहाले नेपाल–भारत सिमाका विषयमा विवाद रहेकाले यसलाई कुटनीतिक तवरले टुंगो लगाउनुपर्नेमा जोड दिनुभयो ।
प्रेस संगठन नेपाल कञ्चनपुरले आइतबार महेन्द्रनगरमा आयोजना गरेको पत्रकार सम्मेलनमा उहाले कालापनीमा भएका सीमा विवाद टुङ्गो लगााउन भारतले पनि उदारता देखाउनुपर्ने बताउनु भयो । कालापानी, सुस्तासहित समग्र सीमा विवाद समाधान गर्न भारतले उदारता देखाउनु पर्नेमा आफ्नो जोड रहेको उल्लेख गर्नुभयो ।
नेता नेपालले एमसीसीका विषयमा पनि आफ्नो धारणा राख्दै आर्थिक विकासका लागि आएको सहयोग स्वीकार गर्नुपर्नेमा जोड दिनुभयो । यद्यपी यस विषयमा केही विवाद भएकाले त्यसको निक्र्यौल गरेरमात्र स्विकार गरिने समेत स्पष्ट पार्नुभयो । नेकपाको स्थायी समितिमा एमसिसीको विषयमा छलफल भएको र केन्द्रीय समितिमा पनि थप छलफल हुने उल्लेख गर्दै नेता नेपालले थप विश्लेषण गर्नुपर्ने भएकाले सबैको भावना समेटेर अघि बढ्नुपर्नेमा जोड दिनुभयो ।
फरक प्रसंगमा नेता नेपालले आसन्न राष्ट्रियसभाको निर्वाचनमा नेकपाको शक्ति वृद्धि हुने बताउनु भयो । ‘प्रतिनिधिसभा हुँदै अब राष्ट्रियसभामा पनि नेकपाको शक्ति वृद्धि हुँदैछ’, उहाले भन्नुभयो, ‘जनभावनाअनुसार सरकार पनि गम्भीर भएर अघि बढ्नुपर्छ ।’ जनताको भरपर्दो र विश्वासिलो पार्टीका रूपमा नेकपा रहेको भन्दै नेता नेपालले प्रतिनिधिसभाको सभामुख चयनका विषयमा पनि पार्टीको केन्द्रीय कमिटीले टुङ्गो लगाउने जानकारी दिनुभयो ।
प्रतिक्रिया दिनुहोस्