जनता टाइम्स

२४ माघ २०७६, शुक्रबार १६:२०

जब वकिल नै ४२ लाख घुससहित पक्राउ परे


काठमाडौं, माघ २४

नेपाल प्रहरीको केन्द्रीय अनुसन्धान व्यूरोले ४२ लाख घूस लिने अधिवक्ता टंकबहादुर राना मगरलाई पक्राउ गरेको छ । राजस्व चुहावट मुद्दामा थुनामा रहेका व्यक्तिलाई छुटाइदिन्छु भनेर ४२ लाख घूस लिने राना मगरलाई पक्राउ गरेको हो ।

महानगरीय अपराध महाशाखाका प्रमुख एसएसपी सहकुल थापाले जनन्यायीक कानुनी सेवा केन्द्र माइतीघरका अधिवक्ता राना मगरलाई शुक्रबार पक्राउ गरिएको जानकारी दिनुभयो ।

राजस्व चुहावट प्रकरणमा नख्खु कारागारमा रहेका रमेश दाहाललाई भनसुनमा छुटाइदिन्छु भन्दै ४२ लाख घूस लिएको परिवारको निवेदनका आधारमा उनलाई पक्राउ गरिएको थापाले बताउनु भयो ।

अधिवक्ता रानाले गत साउन २४ गते दाहालका परिवारबाट ४२ लाख घूस रकम लिएका थिए । थुनामा रहेका दाहाललाई अदालतले २ करोड, २५ लाख धरौटी माग गरेको छ । दाहाल २०७५ मंसिर २७ गतेबाट थुनामा छन् ।