१३ फाल्गुन २०७६, मंगलबार ००:००

रवीन्द्रको प्रथम स्मृति दिवसमा प्रधानमन्त्री सहभागी हुने


पोखरा, फागुन १३

तत्कालीन पर्यटनमन्त्री रवीन्द्र अधिकारीको प्रथम स्मृति दिवसमा प्रधानमन्त्री केपी शर्मा ओली सहभागी हुनुहुने भएको छ । उहाको फागुन १५ गते वार्षिकी परेको छ ।

पोखरा सभागृहमा हुने कार्यक्रममा सहभागी हुन प्रधानमन्त्री एंव नेपाल कम्युनिष्ट पार्टीका अध्यक्ष ओली सहभागी हुनुहुने बताइएको छ । सो अवसरमा पोखराको शहीद तथा विभूति पार्कमा रवीन्द्र अधिकारीको पूर्णकदको सालिकको अनावरण गर्ने कार्यक्रमसमेत तय भएको छ ।

रवीन्द्र अधिकारी स्मृति प्रतिष्ठानले उहाँको योगदानलाई स्मरण गर्दै विविध कार्यक्रमका साथ वार्षिक स्मृति दिवस मनाउने निर्णय पनि गरेको छ । प्रतिष्ठानले आज पोखरामा पत्रकार सम्मेलन गरेर सो विषयका बारेमा जानकारी गराएको हो । स्मृति दिवसका अवसरमा फागुन १० गते कलाकारद्वारा क्यानभासमा रवीन्द्र अधिकारी कार्यक्रम सम्पन्न गरिसकेको प्रतिष्ठानका महासचिव धनराज आचार्यले जानकारी दिनुभयो ।

यसैगरी देशभरका स्नातक र स्नातकोत्तर तहका विद्यार्थी सहभागी हुने गरी ‘नेपाली राजनीति, युवा र रवीन्द्र अधिकारी’ शीर्षकमा निबन्ध प्रतियोगिता कार्यक्रमसमेत सम्पन्न भएको र विजेताको नामसहित पुरस्कार सोही दिन प्रदान गर्ने आचार्यले बताउनुभयो । फागुन १६ गते ‘समाजमा रुपान्तरणमा रवीन्द्र अधिकारी’ विषयक कार्यशाला गोष्ठीसमेत आयोजना गरिनेछ ।

रवीन्द्र पत्नी एवं प्रतिष्ठानका अध्यक्ष विद्या भट्टराईले प्रतिष्ठानले राजनीतिभन्दा माथि रहेर रवीन्द्रलाई सम्झन चाहने सबैको साझा संस्थाका रुपमा रहेको बताउनुभयो । उहाँले भन्नुभयो, “यो दुःखद् समयको एक वर्ष पुग्यो, शोकलाई शक्तिमा बदलेर हामी उहाँलाई स्मरण गर्दैछौँ”, प्रतिष्ठान रवीन्द्र अधिकारीले समाजमा पु¥याएको योगदानलाई चिरस्थायी बनाउने र उहाँले अवलम्बन गरेका विचार एवं सिद्धान्तलाई स्थापित गर्दै जीवन्त राख्न सक्रिय रहने बताउनुभयो । अधिकारीका सकारात्मक र अविस्मरणीय कार्यलाई चिरस्थायी बनाउन गत जेठ १८ गते गैरनाफामूलक संस्थाका रुपमा प्रतिष्ठानको गठन भएको हो ।