काशीराम शर्मा/बाँके

प्रहरीले प्रतिबन्धित लागुऔषध चरेस ओसारपासारको आरोपमा एक जना भारतीय नागरिकलाई पक्राउ परेपछि शुक्रबार रातिसम्म बाँकेको राप्तीपारि नरैनापुर क्षेत्र तनावपूर्ण बन्यो । पक्राउ परेका भारतीय नागरिकलाई छुटाउन दबाब दिँदै प्रहरी चौकी घेराउ गरेका थिए ।

नेपालगञ्जबाट नरैनापुर पुगेर लागुऔषधविरुद्ध परिचालित प्रहरीको विशेष टोलीले भारतीय नागरिक देवीविन विश्वकर्मालाई पक्राउ गरेपछि स्थिति तनावपूर्ण बनेको थियो । पक्राउपछि भारतीय नागरिकलाई प्रहरी चौकीमा राखेका मुचुल्काका लागि गएको प्रहरी टोलीमाथि ढुंगामुढा गरी तनाव प्रयास भएको थियो ।

प्रहरी चौकी घेराउसँगै तोडफोड र ढुंगामुढा गर्न थालेपछि स्थिति नियन्त्रणमा लिन प्रहरीलाई ६५ राउण्ड हवाई फायर गर्नुपरेको बाँके प्रहरीका निमित्त प्रमुख प्रहरी नायब उपरीक्षक प्रकाश सापकोटाले जानकारी दिनुभयो । ‘त्यहाँको अवस्था अहिले नियन्त्रणमा छ । थप घटना हुन नदिन अहिले पनि सुरक्षाकर्मी परिचालन गरेका छौं,’ सापकोटाले भन्नुभयो ।

चरेशसहित पक्राउ परेका भारतीय नागरिक देवीविनलाई अबेर राति नै नेपालगञ्ज ल्याइएको थियो । देवीदिन पक्राउ परेपछि सीमापारिबाट आएका भारतीय युवाले उनलाई नछोडेसम्म प्रहरीलाई जान नदिने भन्दै घेरा हालेका थिए । सो क्रममा इलाका प्रहरी कार्यालय भगवानपुरको एउटा गाडी र मोटरसाइकल तोडफोड भएको थियो ।

प्रहरीको गाडीमा आगजनीको प्रयाससहित र ढुंगामुढा गरेपछि थप प्रहरी बल पुगेर अवस्था नियन्त्रण गर्न खोजेको थियो । तर प्रहरीको उपस्थिति कमजोर देखेपछि उत्तेजित भीडले क्रमशः आक्रोश फैलाउँदै चौकीमै घेराउ गर्न पुगे । स्थितिलाई नियन्त्रणमा लिन हवाई फायर नै गर्नुपरेको थियो ।

देवीविनलाई पक्राउ गरेपछि सीमा क्षेत्रबाट आएका भारतीय नागरिक आक्रमक भएर प्रहरीमाथि जाइलागेका थिए । उनीहरूलाई स्थानीय गाउँलेले साथ दिएपछि मुठभेडको अवस्था सिर्जना भएको थियो । जिल्लाबाट बन्दोबस्तीसहित पुगेको नेपाल प्रहरी र सशस्त्र प्रहरीको टोलीले राति १२ बजेतिर घटनास्थललाई पूर्णरूपमा नियन्त्रणमा लिएको प्रहरी नायब उपरीक्षक सापकोटाले बताउनुभयो ।

चार सय बढी मानिसले चौकी घेराउ गरेका थिए । नेपालगञ्जबाट नेपाल प्रहरी र सशस्त्र प्रहरीको तीन वटा टोली, आसपासका चौकीबाट समेत नरैनापुरमा मद्दतका लागि पुगेका थिए भने नेपालगञ्जमा थप सुरक्षाकर्मीलाई तयारी अवस्थामा राखिएको थियो । स्थिति नियन्त्रणमा आएपछि थप बल पठाउनु नपरेको प्रहरीको भनाई छ ।

तस्करी गरेर नेपाल ल्याउँदै गएको मालसामानसहित गत साता सशस्त्र प्रहरीले नियन्त्रणमा लिएका अपराधीलाई यसरी घेरा हाली भारतीयले छुटाएर लैजान सफल भएका थिए । ‘राज्यको कमजोर उपस्थिति देखेर आज पनि तस्करलाई त्यसैगरी छुटाएर लैजाने प्रयास भयो,’ प्रहरी नायब उपरीक्षक सापकोटाले भन्नुभयो, ‘हामीले त्यो प्रयासलाई असफल पारेका छौं ।’

चार घण्टा घेराबन्दीमा सांसद

भारतसँग जोडिएका नयाँगाउँ, खयरभट्टीलगायतका गाउँको अवस्था र राज्यले सहयोग गर्नुपर्ने प्राथमिकताका योजना बनाउन आफ्नो निर्वाचन क्षेत्रमा पुग्नुभएकी प्रदेश सांसद कृष्ण केसी नमूनासहितको टोलीमाथि पनि आक्रमणको प्रयास भएको थियो । पक्राउ परेका देवीविनलाई छुटाउन माग गर्दै सांसदसहितको टोलीलाई भारतीय नागरिक र स्थानीयले झण्डै चार घण्टा घेराबन्दी गरेका थिए ।

प्रदेश सांसद केसी चढेको गाडीमा आगजनी प्रयाससमेत भएको थियो । ‘निकै डरलाग्दो अवस्थाको सामना गरियो,’ सांसद केसीले भन्नुभयो, ‘अहिले म केही कुरा बोल्न र भन्न सक्ने अवस्थामा छैन ।’ स्थलगत अनुगमनमा गएका बेला आफूमाथि भएको आक्रमण प्रयासलाई ‘गम्भीरतापूर्वक लिएको’ सांसद केसीको भनाइ छ ।

सांसद केसीसहित टोलीलाई घेराबन्दी पारेपछि सशस्त्र प्रहरीले कडा सुरक्षा दिएर सांसद र गाउँपालिकाका प्रमुखलाई झण्डै चार घण्टासम्म गाउँपालिकाको कार्यालयभित्र राखेको थियो । राति १० बजेपछि वडाध्यक्षको गाडीमा सांसद केसीको टोलीलाई भगवानपुर प्रहरीले सुरक्षा दिएर आफ्नो कार्यालयमा पुर्याएको थियो ।

सीमा क्षेत्रको स्थलगत फर्किएका प्रदेश सांसदसहित नरैनापुर गाउँपालिका अध्यक्ष इस्तियाक अहमद शाहमाथि पनि आक्रमण प्रयास भएको थियो । ‘मेरा कुरा पनि सुनेनन्, धेरै दुःख लागेको छ,’, अध्यक्ष शाहले भन्नुभयो, ‘सामान्य घटनामा भारतीय घुसपैठ भएर गम्भीर बन्यो ।’

उहाँले छानबिनपछि सत्यतथ्य पत्ता लाग्ने आश्वासन दिँदा पनि सुनुवाइ नभएकामा दुःख व्यक्त गर्दै भन्नुभयो, ‘कुरै नसुनेर जबर्जस्ती गर्न खोजियो ।’ उहाँले जायज मागका पक्षमा कानून, समाज र आफू पनि साथमै रहेको पटकपटक आग्रह गर्दा पनि उल्टै ढुंगामुढा गर्न थालेपछि प्रहरी बल प्रयोग गर्न बाध्य भएको थियो । घटना भएको क्षेत्र जिल्लाको दुर्गम क्षेत्र मानिने नरैनापुर पूर्वी–दक्षिणी सिमानामा पर्छ ।