काठमाडौं, बैशाख २५
संघीय संसदको छैठौं अधिवेशन सुरु हुनु अघि सांसदमा कोभिड १९ संक्रमण रहे नरहेको बारे पीसीआर परीक्षण सुरु भएको छ । उच्च स्वास्थ्य सुरक्षाका बीच अधिवेशन आह्वान भएको उल्लेख गर्दै सचिवालयले प्रतिनिधिसभाका २ सय ७५, राष्ट्रिय सभाका ५८, सचिवालयका कर्मचारी, सुरक्षाकर्मीसहित करिब ५ सय जनामा पीसीआर परीक्षणका लागि स्वाब संकलन गरिरहेको छ ।
राष्ट्रिय सभा सदस्यहरुको बिहान १० बजे र प्रतिनिधि सभाका सांसदहरुको ११ बजेदेखि पीसीआर परीक्षणका लागि स्वाब संकलन भइरहेको छ । स्वास्थ्यकर्मीले सभामुख अग्नीप्रसाद सापकोटा, राष्ट्रिय सभा अध्यक्ष गणेशप्रसाद तिमिल्सिनाको पनि स्वाब संकलन गरेका छन् । संक्रमित क्षेत्रका सांसद, संक्रमणका समय काठमाडौं बाहिर गएका सांसदलाई प्राथमिकताका आधारमा परीक्षण गर्ने तयारी भएको राष्ट्रिय सभाका सचिव राजेन्द्र फुयालले जानकारी दिनुभयो ।
शंकास्पद देखिएका सबै सांसदको परीक्षण रिपोर्ट आजै रातिसम्ममा दिने योजना सहित तयारी भएको संसद सचिवालयले जनाएको छ । लकडाउनपछिको समयमा काठमाडौं बाहिर नजाने र संक्रमण नभएका सांसद तथा कर्मचारीको परीक्षण भने दोस्रो चरणमा हुने सचिव फुयालले बताउनुभयो ।
संक्रमण देखिए उनीहरुलाई तत्काल आईसोलेशनमा पठाउने र नदेखिए भोलीबाट सुरु हुने अधिवेशनमा सहभागी हुन सक्ने सचिवालयको भनाई छ । संघीय संसदको छैठो तथा बजेट अधिवेशन भोली अपरान्ह ४ बजे सुरु हुँदैछ ।
प्रतिक्रिया दिनुहोस्