Single Top Ad
अर्थमूख्य समाचारसमाचारसमाज

प्रधानमन्त्रीले दिनुभयो व्यवसायीलाई खुशीको खवर

काठमाडौं, असार १५ । प्रधानमन्त्री केपी शर्मा ओलीले निजी क्षेत्रसँगको सहकार्यमा नै सरकार अगाडि बढ्ने भएकाले कुनै पनि प्रकारको दुविधा राख्न नपर्ने प्रष्ट पार्नुभएको छ । नेपाल उद्योग परिसङ्घको १७औँ वार्षिकोत्सव समारोहलाई श्रव्यदृश्यका माध्यमबाट आज सम्बोधन गर्दै प्रधानमन्त्री ओलीले यस्तो बताउनु भएको हो ।

प्रधानमन्त्री ओलीले व्यवसायीलाई अप्ठ्यारो पार्ने सरकारको नियत नभएको पनि बताउनुभयो । उहाँले निजी क्षेत्रसँग मिलेर नै सरकारले आफ्ना गतिविधि अगाडि बढाउने भएकाले व्यवसायीलाई अप्ठ्यारो बनाउनेतर्फ सोच्न पनि नसकिने प्रष्ट पार्नुभयो । प्रधानमन्त्री ओलीले उद्योगी तथा व्यवसायीको भूमिकाको समेत सरकारले कदर गर्ने उल्लेख गर्नुभयो । “देशको विकास र समृद्ध नेपालको प्रयासमा हामी मिलेर नै अगाडि बढ्ने हो । सरकारको नीति र नियत दुवै ब्यवसायीलाई हतोत्साही गर्ने, असहयोग गर्ने छैन । त्यस्तो विषयमा सोच्नसमेत सकिँदैन,” प्रधानमन्त्री ओलीले भन्नुभयो ।

कोरानाका कारण अर्थतन्त्रमा परेको सङ्कटबाट कसरी बचाउने, पुनःउत्थान गर्दै भावी रणनीति तय गर्ने लक्ष्यका साथ कार्यक्रमको आयोजना गरेकामा प्रधानमन्त्रीले परिसङ्घलाई बधाई तथा शुभकामना समेत दिनुभयो । परिसङ्घले नेपालको उद्योग, उत्पादनमूलक एवं सेवाका क्षेत्रका महत्वपूर्ण काम गरेको र अर्थतन्त्रलाई माथि उठाउन पुर्याएको योगदान सराहनीय रहेको तथा क्षेत्रीय र अन्तरराष्ट्रियस्तरमा समेत आफ्नो छवि स्थापना गरेको भन्दै प्रधानमन्त्री ओलीले खुशी प्रकट गर्नुभयो ।

निजी क्षेत्रकै आग्रहमा सरकारले अख्तियारसम्बन्धी विधेयक अगाडि नबढाइएको र नियमन गर्ने निकाय अरु नै रहेकोसमेत स्पष्ट पार्नुभयो । “निजी क्षेत्रको भ्रष्टाचारसम्बन्धी काम कारवाही हेर्न अख्तियार दुरुपयोग अनुसन्धान आयोगलाई पनि प्रवेश दिने कानूनबाट अहिलेलाई सरकार पछि हटेको छ । व्यवसायीको आग्रहबमोजिम नै सरकार यो विषयबाट पछि हटेको हो, प्रधानमन्त्री ओलीले भन्नुभयो । उद्योग व्यवसायका क्षेत्रमा परेको समस्या समाधानका लागि सरकारले आवश्यक निर्णय गर्ने जानकारी पनि उहाँले दिनुभयो ।

“स्वभाविकरुपमा निजी क्षेत्रका काम कारवाही, व्यवसायजन्य कुरालाई नियमन गर्ने थुप्रै निकाय हुँदाहुँदै अख्तियारले पनि हेर्ने कुरा आयो, तपाईंहरुको असहमतिका विषयमा केही दिन पहिले पनि मैले यो अहिले आवश्यक छैन भनेको थिएँ, प्रधानमन्त्री ओलीको भनाइ थियो । मानव जातिले अप्ठ्यारो परिस्थिति झेल्दै आएको र त्यस्ता परिस्थितिबाट पारसमेत पाउने उहाँले उल्लेख गर्नुभयो । राष्ट्रिय परिवेशमा उद्योग व्यवसायका क्षेत्रमा गरेको योगदानलाई थप विस्तार गर्दै लैजाने विश्वास व्यक्त गर्दै प्रधानमन्त्रीले भन्नुभयो, “अहिले देखिएका सबै समस्या साझा समस्या हुन, समाधान पनि साझा तवरले नै गर्नेछौं । उपलब्धि हुँदा पनि सबैका लागि, अप्ठ्यारो पर्यो भने पनि हामी सबै एकजुट भएर समाधान गर्नुपर्छ ।”

कोरोनाको महामारीका कारण यतिखेर सरकारको प्रमुख दायित्व जनताको जीवन रक्षा नै भएकाले त्यसैमा केन्द्रित गरेको प्रधानमन्त्री ओलीले बताउनुभयो । उहाँले पछिल्ला दिनमा विपत्तीले पारेको असरबाट मुक्त भएर कसरी अगाडि बढ्ने सन्दर्भमा सबैको साझा प्रयास हुनुपर्ने स्पष्ट पार्नुभयो ।

Comment here