काठमाडौं, बैशाख १७

औषधि व्यवस्था विभाग (डीडीए)ले औषधि आयात गर्ने विभिन्न कम्पनीहरुलाई थप ५५ हजार भाइल रेम्डेसिभिर खरिदको लागि अनुमति दिएको छ । यस्तै विभागले कोभिडकै बिरामीलाई प्रयोग हुने अर्को इन्जेक्सन टोसिलीजुमाव आयात गर्न समेत अनुमति दिएको हो । कोरोना भाइरसको नयाँ भेरियन्ट, दोस्रो लहर देशमा तिब्र गतिमा बढेपछि विभागले ठूलो परिमाणमा रेम्डेसिभिर र टोसलीजुमाव इन्जेक्सन आयातका लागि अनुमति दिएको हो ।

विभागका प्रवक्ता सन्तोष केसीका अनुसार एसियायी बंगलादेशलाई १० हजार भाइल, बेकोन फर्मासीटकललाई १० हजार, हेल्थकेयर फर्मास्युटिकल्सलाई १० हजार र इन्सेक्ट्राले २५ हजार भाइल गरी कुल ५५ हजार भाइल ल्याउन अनुमति दिएको हो ।

गएको हप्ता मात्रै विभागले बंगलादेशबाट ३० हजार भाइल रेम्डेसिभिर ल्याउन बेक्सिम्को र इन्सेक्ट्रालाई क्रमश २० हजार र १० हजार भाइलको अनुमति दिएको थियो । आउँदो आइतबारसम्म अब सबै गरेर जम्मा ८५ हजार भाइल रेम्डेसिभिर नेपाल आउने भएको छ । रेम्डेसिभिर प्रयाप्त हुने भन्दै प्रवक्ता केसीले सबैलाई नआत्तिन पनि अनुरोध गर्नुभएको छ । विभागले टोसिलीजुमाव इन्जेक्सनलाई पनि आकस्मिक प्रयोगका लागि अनुमति दिएको छ ।

विभागले प्रयोग अनुमतिसंगै यो औषधि स्वीट्जरल्याण्डबाट ल्याउनुपर्ने २ हजार भाइल ल्याउने जिम्मा यतिकेम प्रालिलाई दिएको छ । नेपालमा १ भाइल इन्जेक्सनको करीव ६० हजार पर्न सक्ने अनुमान गरिएको छ भने चिकित्सकहरुले संक्रमितका लागि यो इन्जेक्सन २ देखि ४ भाइलसम्म आवश्यक पर्न सक्ने बताएका छन् ।