काठमाडौं, बैशाख २९

नेपालमा कोरोना भाइरसको सक्रिय संक्रमितको संख्या एक लाख नाघेको छ। पछिल्लो दुई सातामा नै नेपालमा ७० हजारभन्दा बढी संक्रमित थपिएका हुन्। पछिल्लो २४ घण्टामा देशभर ९ हजार ३०५ जना व्यक्ति कोरोना संक्रमित पुष्टि भएका छन्। मन्त्रालयका अनुसार देशभरका प्रयोगशालामा २० हजार ३६२ जनाको पीसीआर विधि र ४२४ जनाको एन्टीजेन विधिबाट परीक्षण गर्दा ९ हजार ३०६ जना संक्रमित पुष्टि भएका हुन्।

पिसिआर विधिबाट ९ हजार २३८ र एन्टीजेन विधिबाट ६७ जना संक्रमित पुष्टि भएका हुन्। स्वास्थ्य तथा जनसंख्या मन्त्रालयका अनुसार आज ४ बजेसम्म नेपालमा सक्रिय संक्रमितको संख्या एक लाख एक हजार ६३४ पुगेको छ। जसमध्ये संस्थागत आइसोलेसनमा ७ हजार २९१ र होम आइसोलेसनमा ९४ हजार ३ सय छन्।

थप भएको संख्यासँगै नेपालमा सक्रिय संक्रमितको संख्या एक लाखभन्दा माथि पुगेको हो। पछिल्लो २४ घण्टामा १६८ जना संक्रमितको मृत्यु भएको छ। नेपालमा हालसम्म ४ हजार २२५ जनाको मृत्यु भएको छ। आज देशभर ५१७ जना व्यक्ति क्वारेन्टाइनमा छन्।मन्त्रालयका अनुसार पछिल्लो २४ घण्टामा चार हजार ४४४ जना व्यक्ति निको भएका छन्।