काठमाडौं, भदौ २८ । बोक्सीप्रथा केन्द्रीत अनुसन्धानात्मक अध्ययनसहितको पुस्तक ‘शल्यक्रिया’ सार्वजनिक भएको छ । महिला, सामाजिक समितिका सभापति निरूदेवी पाल, मानव अधिकारकर्मी सुवोध प्याकुरेल र चेन्ज एक्सन नेपालका अध्यक्ष इन्दीरा घलेले शल्यक्रियाको संयुक्त रूपमा लोकार्पण गर्नुभएको हो । राष्ट्रिय महिला आयोगमा सोमवार आयोजित कार्यक्रममा पुस्तक लोकार्पण गर्दै सभापती पालले हिंसा र अधिकारबारेको अनविज्ञताले महिला पीडित भइरहेको बताउनुभयो ।

उहाँले महिला हिंसा, बोक्सीलगायतका सामाजिक विकृतीका घटनाबारे खुलेर नबताउनाले त्यस्ता घटनाहरुमा पीडितले न्याय पाउन सक्दैनन् भन्दै दुःख व्यक्त गर्नुभयो । लेखक एवं सञ्चारकर्मी लोग्शरी कुँवरले बोक्सीको आरोपमा महिलामाथि भएका हिंसाको समाचार लेख्दा गरिएको नमिठो अनुभवले यसबारेमा गहिरिएर अध्ययन गर्न जाँगर पलायो, सोही क्रममा पुस्तक तयार भएको बताउनुभयो ।

लेखकद्वय सञ्जय खड्का र कुँवरले लेख्नुभएको शल्यक्रियामा बोक्सी प्रथा सम्वन्धी विद्यमान अन्धविश्वासको वैज्ञानिक विश्लेषण गरिएको छ । साथै बोक्सी सम्वन्धी अवधारणा, विश्वमा बोक्सी हिंसाका घटनाहरू, बोक्सी तथा धामी झाँक्रीको इतिहास, भूतप्रेत सम्वन्धी अन्धविश्वासबारे अध्ययन समावेश गरिएको छ । त्यसैगरी, बोक्सीको आरोप र यातना, उपचार पद्धती, धामीझाँक्रीको लोकप्रियताबारे पनि पुस्तकमा चर्चा गरिएको छ ।