२९ भाद्र २०७८, मंगलबार ००:००

अग्नि सापकोटा अनुसन्धान विभाग प्रमुख हुनुपर्थ्यो : महेश बस्नेत


काठमाडौं, २९ भदौ । प्रमुख प्रतिपक्षी नेकपा एमालेका केन्द्रीय सदस्य महेश बस्नेतले सभामुख अग्निप्रसाद सापकोटाको आलोचना गर्नुभएको छ । एमाले जिल्ला कमिटी अर्घाखाँचीको बृहत् कार्यक्रता भेलालाई सम्बोधन गर्दै बस्नेतले एमाले फुटाउने मतियार बनेको भन्दै सापकोटाको आलोचना गर्नुभयो ।

पूर्वमाओवादी सांसदहरु लेखराज भट्ट, टोपबहादुर रायमाझी, प्रभु साहहरुको पदमुक्तिको सूचना २४ घण्टाभित्र टाँस गरेका सभामुख सापकोटाले माधव नेपालसहित १४ सांसदलाई एमालेले गरेको कारवाही पटक–पटक अध्ययन गर्दैछु भनेर रोकेर भेदभाव गरेको बस्नेतको भनाइ थियो । ‘लेखराज भट्टहरुको २४ घण्टामा सूचना निकाल्नुभयो ।

माधव नेपालसहित १४ जनाको आजसम्म सूचना निकाल्नुभएन । पटक–पटक बुझ्दैछु । अध्ययन गर्दैछु । हेर्दैछु भन्नुभयो । सबभन्दा धेरै अध्ययन, अनुसन्धान गर्ने, जाँचबुझ गर्ने मान्छे अग्नि सापकोटा देखिन्छ,’ उहाँले भन्नुभयो,‘उहाँ सभामुख होइन अनुसन्धान विभाग प्रमुख बनाउने स्वभाव देखिन्छ । सापकोटाले आफ्नो छवि ध्वस्त बनाउँदैछन् ।’

सभामुखले कार्यव्यवस्था नबसी संसद बोलाएर परम्परा तोडेको बस्नेतको आरोप छ । ‘जबरजस्ती संसद चलाए । मर्यादापालक बेलमा पठाइयो । संसद अवरोध भएको बेला सदन चल्दैन । वेल घेर्दा पनि सभामुखले अवरोध मान्नुभएन,’ उहाँले थप्नुभयो । बस्नेतले दौडिएर रोस्टममा पुगेका अर्थमन्त्री जनार्दन शर्माले पनि षडयन्त्र गरेको आरोप लगाउनुभयो ।

‘अर्थमन्त्री जनार्दन शर्माको विगत हेर्नुभयो भने सुरेन्द्र पाण्डे अर्थमन्त्री हुँदा ब्रिफकेश खोस्ने र सदनमा नौटंकी देखाउने यिनै जनार्दन शर्मा हुन् । यिनै अहिले कुदेर गए । उनको मनको पाप, षडयन्त्रका कारणले दौडेर गरे,’ उहाँले भन्नुभयो । बस्नेतले एमाले कमजोर नरहेको दाबी गर्नुभयो । उहाँले थप्नुभयो, ‘एमाले ज्युँदो बाघ हो । स्याल र ब्वाँसोहरुलाई एक धाप्को हान्यो भने परमधाम भइहाल्छ । त्यसकारण बाघलाई नजिस्क्याउ । बाघले झ्यापु हान्यो भने स्याल र ब्वाँसोहरु सिद्धिन्छ ।’