काभ्रेपलाञ्चोक, असार १४

प्रधानसेनापति पूर्णचन्द्र थापाले नमोबुद्ध नगरपालिका–२ भकुण्डेबेँसीस्थित नेपाली सेनाको २६ नम्बर बाहिनी अड्डाको बागबाणी इलाका (दलसिं पाखा) मा आज ‘एक नागरिक, एक फलफूल बिरुवा’ रोपण कार्यक्रमको शुभारम्भ गर्नुभएको छ । उहाँले आँपको बिरुवा रोपेर वृक्षरोपण कार्यक्रमको शुभारम्भ गर्नुभएको हो ।

अड्डाको एक हजार रोपनीमध्ये ३८ रोपनी क्षेत्रमा विभिन्न प्रजातिका बिरुवा रोपिने कार्यक्रम रहेको निमित्त बाहिनीपति दिनेश केसीले जानकारी दिनुभयो । उहाँका अनुसार यसअघि बाहिनीको हाताभित्र विभिन्न प्रजातिका ३२० फलफूलका बिरुवा रोपण गरी संरक्षण तथा सम्वद्र्धन गरिँदै आएको छ ।

आज आँप १००, लिचीे ७०, अनार १००, कागती १००, कटहर १००, लप्सी ५०, किम्बुका १४ वटा तथा अन्य प्रजातिका ४६६ बिरुवा रोपिएको छ । वृक्षरोपणका लागि बिरुवा धुलिखलस्थित विष्णुदल गणको नर्सरी, डिभिजन वन कार्यालय र कृषि ज्ञान केन्द्रले उपलब्ध गराएका थिए ।