एजेन्सी । अमेरिकी प्रतिनिधिसभाकी सभामुख न्यान्सी पेलोसीको ताइवान भ्रमणबाट आक्रोशित भएको चीन शान्त नहुँदै फेरि अमेरिकी सांसदहरूको टोली ताइवान आइपुगेको छ । यसबाट आक्रोशित चीनले ताइवानको पहिलेभन्दा अझ नजिक गएर सैन्य अभ्यास सुरु गरेको छ ।

पेलोसीले हालै ताइवान भूमण गरेकी थिइन् । यसबाट रिसाएको चीनले ताइवान सिमाना वरिपरि धेरै सैन्य अभ्यास गरेको थियो। चीनले ताइवानमा अमेरिकी हस्तक्षेपलाई आफ्नो सार्वभौमसत्तामा हस्तक्षेपको रूपमा हेर्छ।

सांसद इडी मार्कीको नेतृत्वमा पाँच सदस्यिय सांसदहरूको टोली आइतबार अघोषित भ्रमणमा ताइपेई आइपुगेको हो ।

धेरै चिनियाँ विमानहरू उडेका छन्
न्यान्सीको भ्रमणपछि ताइवान पुग्ने यो दोस्रो उच्चस्तरीय समूह हो । यसपछि चीनले ताइवानको हवाई क्षेत्र अतिक्रमण गरेको छ । उल्लेखनीय कुरा के छ भने न्यान्सी पेलोसीको ताइवान भ्रमणपछि चिनियाँ सेनाले ठूलो मात्रामा मिसाइल प्रहार गरेको थियो । यसबाहेक जेट र युद्धपोत पनि तैनाथ गरिएको थियो।

ताइवान न्यूज डट कमका अनुसार, कम्तिमा २२ चिनियाँ सैन्य विमान, छ नौसेना जहाज र १० युद्ध विमानहरू मध्य रेखा पार गरी ताइवानको आकाशमा घुमेका थिए।

ताइवानी नेताहरूलाई चेतावनी
चिनियाँ जनमुक्ति सेनाको पूर्वी थिएटर कमाण्डका अनुसार उसले सोमबार ताइवानको समुद्री र हवाई क्षेत्रमा सैन्य अभ्यास गरेको छ। यो सैन्य अभ्यासबाट यस क्षेत्रमा अशान्ति र अस्थिरता सिर्जना गर्न खोजिरहेका ताइवान र अमेरिकालाई कडा सन्देश गएको पनि विज्ञप्तिमा भनिएको छ ।

चिनियाँ विदेश मन्त्रालयका प्रवक्ता वाङ वेनबिनले सोमबार नियमित पत्रकार सम्मेलनमा अमेरिकाले एक चीन नीतिलाई चुनौती दिएको बताए । यसैगरी चीनको ताइवान मामिला कार्यालयले अलग–अलग विज्ञप्ति जारी ताइवानी नेताहरूलाई यसका लागि कडा सजाय दिइने चेतावनी दिएको छ।

अमेरिकालाई पनि चेतावनी
यसैबीच, एक छुट्टै विज्ञप्तिमा चीनको रक्षा मन्त्रालयले अमेरिकी सांसदहरूको यो भ्रमण चीनको सार्वभौमसत्तामाथि आक्रमण भएको बताएको छ। अमेरिकाको यी कदमले ताइवान क्षेत्रमा शान्ति र अस्थिरता बढाएको पनि उनले बताए । रक्षा मन्त्रालयले पीएलएले आफ्नो राष्ट्रिय सार्वभौमसत्ता र क्षेत्रीय अखण्डताका लागि युद्धको तयारी र जनतालाई तालिम दिने बताएको छ।

साथै, कसैले ताइवानको स्वतन्त्रताको बारेमा सोच्छ पनि भने त्यसले विनाश निम्त्याए सरह हुने पनि स्पष्ट पारेको छ। ताइवानसँग अमेरिकाको औपचारिक कूटनीतिक सम्बन्ध छैन। तर, उनले यस टापुलाई स्वतन्त्र गराउने प्रतिबद्धता व्यक्त गर्दै आएका छन् ।