एजेन्सी, १५ भदौ । अभिव्यक्ति स्वतन्त्रतालाई लिएर संसारभरबाट धेरै मुद्दाहरू आइरहेका छन् । तर साउदी अरेबियाबाट अभिव्यक्तिको बदलामा सरकार र न्यायपालिका आफैंले सजाय दिइरहेका घटनाहरू निरन्तर भइरहेका छन् । सामाजिक सञ्जाल प्रयोग गरेको आरोपमा एक महिलालाई ४५ वर्षको जेल सजाय सुनाइएको छ ।

साउदी अरेबियाकी यी महिलाको नाम नूरा हो । मिडिया रिपोर्टका अनुसार महिलालाई केवल एउटा ट्वीटको कारण ४५ वर्षको सजाय सुनाइएको थियो ।

ती महिलालाई साउदी अरेबियाको सामाजिक संरचना बिगार्न इन्टरनेट प्रयोग गरेको आरोप छ। यो सजाय साउदी अरबको एक अदालतले दिएको हो ।
जानकारीका अनुसार नूरामाथि साइबर अपराध विरोधी ऐन अन्तर्गत यो कारबाही गरिएको हो ।

ट्वीटरमा नुराको एकाउन्ट खासै सक्रिय नभए पनि उनको ट्विटका कारण उनी सन् २०२१ को जुलाईमा पक्राउ परेकी थिइन् र अहिले विशेष अदालतमा सोही अपराधमा दोषी ठहर भइन् । सोही मुद्दामा नूरालाई ४५ वर्षको जेल सजाय सुनाइएको थियो ।

यो महिना साउदी अरबबाट रिपोर्ट गरिएको यो दोस्रो यस्तो केस हो। यसअघि साउदी अरेबियाकी एक महिलालाई ट्विटर प्रयोग गरेको आरोपमा ३४ वर्षको जेल सजाय सुनाइएको थियो । लीड्स विश्वविद्यालयमा अध्ययनरत एक साउदी विद्यार्थी बिदामा घर आएका थिए र त्यसपछि उनलाई ३४ वर्षको जेल सजाय सुनाइएको थियो।

उनीमाथि ट्वीटरमा एकाउन्ट रहेको आरोप लगाइएको थियो र उनले केही कार्यकर्तालाई फलो गरेर उनीहरुको ट्वीट रिट्विट गरेका थिए ।