एजेन्सी, १७ भदौ । कर्नाटकको सबैभन्दा शक्तिशाली लिंगायत मठका प्रमुख डा. शिवमूर्ति मुरुगा शरणरुलाई दुई किशोरीलाई यौन दुर्व्यवहार गरेको आरोपमा बिहीबार पक्राउ गरिएको छ। उनलाई १४ दिनको न्यायिक हिरासतमा जिल्ला कारागार चित्रदुर्गमा पठाइएको छ ।

प्रहरीका अनुसार यस मामिलामा एससी एसटी ऐनको उल्लंघन पनि दोषी भेटिएको छ। कर्नाटकका एडीजीपी, कानून र व्यवस्था आलोक कुमारले बीबीसी हिन्दीलाई भने, ‘डा. शिवमूर्तिलाई सीआरपीसीको धारा १६४ अन्तर्गत अदालतमा बयान लिइसकेपछि पक्राउ गरिएको थियो ।’

प्रहरीले घटनामा मठ होस्टेलकी वार्डन रश्मीलाई पनि केही घण्टा सोधपुछपछि पक्राउ गरेको थियो । उनीपछि स्वामी शिवमूर्ति पनि पक्राउ परेका हुन् । यसैबीच, मठका बर्खास्त अधिकृत एसके बसवराजनले भने अग्रिम जमानत पाएका छन् ।

मठ होस्टेलकी वार्डन रश्मीले जनता दल सेकुलर (जेडीएस) का पूर्व विधायक बसवराजनमाथि यौन उत्पीडन र धम्की दिएको आरोप लगाएकी थिइन् । उनको कथित अपराधमा सहयोग गरेको आरोप उनकी श्रीमतीलाई पनि लागेको थियो । उनले पत्रकारहरूलाई भने कि उनी ‘षड्यन्त्रमा संलग्न नभएको।’

उनले भने, ‘अब यो कानुनी लडाइँ हो र मैले केही गलत गरेको छैन भन्ने प्रमाणित गर्छु ।’ पोक्सो अन्तर्गत मैसूरमा स्वामी शिवमूर्ति विरुद्ध एफआईआर दर्ता गरिएको थियो । यसपछि मंगलबार यौन हिंसाका पीडित दुई युवतीले सीआरपीसीको धारा १६४ अन्तर्गत मजिस्ट्रेटको अगाडि बयान दिएका थिए ।

रश्मीले आफ्नो पक्ष राख्दै गत जुलाई २७ मा बसवराजन गर्ल्स होस्टेलमा आएका र त्यही क्रममा उनले बलात्कारको प्रयास गरेको बताएकी थिइन् । जब उनलाई रोक्ने प्रयास गरियो, ‘बसवराजनले मलाई मार्ने धम्की दिए।’

सोही क्रममा पूर्व जिल्ला पञ्चायत अध्यक्ष तथा बसवराजनकी श्रीमती सौभाग्यले आफू र उनका श्रीमान पीडित बालिकालाई उद्धार गर्न होस्टेल गएको बताइन् । बसवराजनले मिडियालाई भने, ‘हामीले ती केटीहरूलाई हाम्रो घरमा लगेका थियौँ तर पछि प्रहरीले केटीहरूलाई हाम्रो घरमा नराख्न सुझाव दियो। त्यसैले भोलिपल्ट हामीले उनीहरूका अभिभावकलाई उनीहरूलाई लैजान आग्रह गरेका थियौँ।’