एजेन्सी, २६ भदौ । अगस्टमा अमेरिकी कंग्रेसका सभामुख न्यान्सी पेलोसीले ताइवान भ्रमणको घोषणा गरेपछि चीनको आक्रामकताको अनुमान गरिएको थियो । पेलोसीको ताइवान भ्रमणपछि चीनले सैन्य अभ्यासमार्फत आफ्नो आक्रामकता विश्वसामु देखायो । अब चिनियाँ सेनाले ताइवानलाई अर्कै तरिकाले परीक्षण गरिरहेको छ ।

ताइवानको सीमामा लगातार ड्रोनहरू घुमिरहँदा, चिनियाँ सेनाले जवाफ दिने उसको क्षमता तौलन थालेको छ। हालै, ताइवानको सेनाले एक चिनियाँ ड्रोनलाई खसालेको छ र साथसाथै यसको सुरक्षा बढाएको छ ।

३० वटा ड्रोन ताइवान तर्फ
ताइवानी सैनिकहरूले सुरुमा चिनियाँ ड्रोनहरूलाई बेवास्ता गरे । यसपछि ताइवानको सिमानातर्फ आउने चिनियाँ ड्रोनको संख्या तीव्र गतिमा बढेको छ । धेरै पटक, यी ड्रोनहरू हटाउन ताइवान पक्षबाट चेतावनी शटहरू चलाइएको थियो । एउटा ड्रोन त गोली लागेर समुद्रमा खसेको थियो ।

गत महिना मात्रै, करिब ३० ड्रोनहरू दुईवटा टापुहरूमा आएका छन् जुन ताइवानको हिस्सा हुन् र चीनको दक्षिण–उत्तर तटमा अवस्थित छन् । अधिकांश ड्रोनहरू या त नागरिक थिए वा पहिचान हुन सकेनन् ।

तर यो निश्चित थियो कि यी सबै ड्रोनहरू ती सैन्य स्टेशनहरूलाई लक्षित गर्ने प्रयासमा थिए जहाँ ताइवानी सैनिकहरू छन् । यी ड्रोनका कारण ताइवान र चीनबीच तनाव बढेको छ । चीनले प्रायः ताइवान आफ्नो सीमाभित्रै भएको दाबी गर्छ ।