एजेन्सी, २६ भदौ । अफगानिस्तानको राजधानी काबुलको एउटा भिडियो यतिबेला भाइरल भइरहेको छ । अमेरिकी ब्ल्याक हक हेलिकप्टर शनिबार यहाँ दुर्घटना भएको छ । तालिवानको रक्षा मन्त्रालयले जानकारी दिएअनुसार दुर्घटनामा तीन अफगान सैनिकको पनि मृत्यु भएको बताइएको छ ।

दुर्घटनामा पाँच सैनिक पनि घाइते भएको बताइएको छ । रक्षा मन्त्रालयका अनुसार यो हेलिकप्टर प्रशिक्षण उडानमा रहेको बेला दुर्घटना भएको हो । गत वर्ष अमेरिकी सेनाले अफगानिस्तान छोड्दा अरबौं डलरको हतियार बाँकी थियो । तालिबान सत्तामा आएपछि अब यी सबै हतियार र विमान उनीहरुले भनेका पूर्व आतंकवादीको हातमा परेका छन् ।

कहाँ दुर्घटना भयो ?
ब्ल्याक हक हेलिकप्टर निकै तल उडिरहेको थियो र अचानक अगाडिपट्टी झुक्यो । केही सेकेन्डपछि त्यो जमिनमा खस्यो । तालिवानको रक्षा मन्त्रालयको आधिकारिक विज्ञप्तिमा भनिएको छ, ‘प्रशिक्षणका लागि उडेको अमेरिकी ब्ल्याक हक हेलिकप्टर प्राविधिक समस्याका कारण दुर्घटनाग्रस्त भएको छ।’

नेशनल डिफेन्स युनिभर्सिटीको क्याम्पसमा यो हेलिकप्टर दुर्घटना भएको हो । अमेरिकाले काबुलमा करिब एक दर्जन ब्ल्याक हक हेलिकप्टर छोडेको थियो ।
अफगान विशेष महानिरीक्षकले सन् २००२ देखि २०१७ सम्म अमेरिकाले अफगानिस्तान सरकारलाई २८ अर्ब डलरको रक्षा उपकरण दिएको बताएको थियो ।

गत अगस्टमा अफगानिस्तानको सरकार ढलेपछि केही हेलिकप्टर छिमेकी मध्य एसियाली मुलुकमा गएका थिए । त्यसबेला अफगान सेनाका सिपाहीहरू त्यसमा चढेर छिमेकी मुलुक गएका थिए । यसको अतिरिक्त, अमेरिकी सेनाले ७० भन्दा बढी विमान र कयौं दर्जन बख्तरबंद वाहनहरू नष्ट गरेको थियो । यससँगै देश छाड्नुअघि हवाई प्रतिरक्षा प्रणाली पनि बिगारिदिएको थियो ।

अफगान पाइलटले देश छोडे
यस वर्षको सुरुमा, तालिबानले भने कि केही क्षतिग्रस्त विमानहरू मर्मत गरिएको छ । अफगानिस्तान वायुसेनाका धेरै प्रशिक्षित पाइलटहरूले अमेरिकी सेनासँग तालिम लिएका थिए ।

तर तालिबान सत्तामा आएपछि उनीहरूले देश छोडे । अमेरिकी सञ्चारमाध्यमका अनुसार २० वर्षमा अमेरिकाले अफगान सुरक्षा बलमा ८३ अर्ब डलर खर्च गरेको छ । सन् २००२ मा अमेरिकाले अफगान सेनालाई केही अर्ब डलरमा तालिम दिन थालेको थियो । त्यसको तीन वर्षपछि अर्थात् सन् २००५ मा अमेरिकाले प्रहरी र सेना दुवैलाई तालिम दिने जिम्मेवारी लिएको थियो ।