एजेन्सी, २२ असोज । रसिया र क्रिमिया जोड्ने पुलमा शनिबार आगलागी हुँदा पुलको केही भाग भत्किएको छ । रुसी अधिकारीहरूले पुलमा ट्रकमा राखिएको बम सडकबाट खसेर आगलागी भएको बताए ।

सार्वजनिक भएको भिडियोमा पुलमा धुवाँको मुस्लो निस्केको देखिन्छ । घटना हुनुभन्दा केही घण्टाअघि युक्रेनको पूर्वी सहर खार्किभमा कैयौँ शक्तिशाली विष्फोट भएका थिए ।

रुसको नेशनल काउन्टर–टेररिज्म कमिटीले पुलबाट गुज्रिरहेको मालवाहक रेलको डिब्बामा पनि आगो लागेको र पुलको दुई भाग आंशिक रूपमा भत्किएको बताएको छ । घटनापछि यातायात अवरुद्ध भएको छ ।

विस्फोटपछि पुलमा सवारी आवागमन ठप्प
यसअघि रिया–नोवोस्ती र टास समाचार एजेन्सीले स्थानीय रुसी अधिकारी ओलेग क्र्युचकोभलाई उद्धृत गर्दै इन्धन भण्डारण ट्याङ्कीमा आगो लागेको र पुलमा सवारी आवागमन रोकिएको बताएको थियो ।

आगो निभाउने काम भइरहेको उनले बताए । सामाजिक सञ्जालमा शेयर गरिएका तस्विरहरूमा आगलागीका कारण पुलमा क्षति पुगेको देखाइएको छ । पूर्वी युक्रेनको खार्किभ सहरमा शनिबार बिहानै विस्फोट भएको केही घण्टापछि आगलागी भएको थियो, जसले आकाशमा धुवाँको मुस्लो देखिएको थियो। यो आगो धेरै टाढाबाट बलेको देखिन्थ्यो ।

खार्किभका मेयर इहोर तेरेखोभले टेलिग्राममा भने कि बिहानको विष्फोट सहरको केन्द्रमा मिसाइल आक्रमणको परिणाम हो । उनले विष्फोटबाट मेडिकल इन्स्टिच्युट र सहरमा रहेको गैरआवासीय भवनमा आगलागी भएको बताए । हताहतीको कुनै रिपोर्ट आएको छैन ।

रुसो–युक्रेन युद्धमा पुलको महत्त्वपूर्ण भूमिका
पुटिनले बुधवार युक्रेन र रुसबीच चलिरहेको युद्धको क्रममा जापोरिझ्झ्या क्षेत्र, युरोपको सबैभन्दा ठूलो आणविक उर्जा केन्द्र सहित युक्रेनका चार क्षेत्रलाई रुसी क्षेत्रको रूपमा अवैध रूपमा दाबी गर्ने कागजातहरूमा हस्ताक्षर गरे ।

सन् २०१४ मा क्रिमियालाई रुसले आफ्नो कब्जामा लिएको थियो र यो पुलले युक्रेनसँग चलिरहेको युद्धमा निकै महत्वपूर्ण भूमिका खेलेको थियो ।