एजेन्सी, १७ माघ । गुजरातको गान्धीनगरको एक अदालतले धर्म गुरु आसाराम बापुलाई २०१३ मा भएको बलात्कार मुद्दामा आजीवन कारावासको सजाय सुनाएको छ । यसअघि सोमबार अदालतले आसाराम बापुलाई बलात्कार मुद्दामा दोषी ठहर गरेको थियो । उक्त मुद्दामा मंगलबार अदालतले सजाय सुनाएको हो । आसाराममाथि सन् २०१३ मा दुई दिदीबहिनीले बलात्कारको मुद्दा दायर गरेका थिए ।

अदालतले आसाराम बापुलाई धारा ३७६, ३७७, ३५४, ३४२, ३५७ र ५०६ (२) अन्तर्गत दोषी ठहर गरेको छ । अदालतले धारा ३७६ (बलात्कार), ३७७ (अप्राकृतिक यौनसम्बन्ध) अन्तर्गत आजीवन कारावासको सजाय सुनाएको छ । यसबाहेक दफा ३५४ (आध्यात्मिक गुरु वा शिक्षकले बलात्कार गरेको कसुरमा) एक वर्ष कैद, दफा ३४२ (गलत थुनामा) ६ महिना कैद र ३५७ (अवैध थुनामा राख्ने र आक्रमण गर्न बल प्रयोग) एक वर्ष कैद र एक वर्ष कैद ५०६ (२) धम्कीमा ।

सबै मिलाएर अदालतले आसारामलाई जन्मकैदको सजाय सुनाएको छ । यससँगै अदालतले पीडितलाई ५० हजार क्षतिपूर्ति दिन आदेश दिएको छ । यसअघि विशेष सरकारी वकिल आरसी कोडेकरले आसारामलाई आजीवन कारावास र भारी जरिवाना लगाउन अदालतलाई अनुरोध गरेका थिए । उनले भने ‘पीडितलाई क्षतिपूर्ति दिनुपर्ने भन्दै अदालतमा निवेदन दिएका छौं ।’

विशेष सरकारी वकिल आर सी कोडेकरका अनुसार पीडितले सुरत प्रहरीमा मुद्दा दायर गरेकी थिइन्, जसलाई २०१३ मा अहमदाबाद प्रहरीमा हस्तान्तरण गरिएको थियो । चाँदखेडा पुलिस स्टेशनले आसाराम बापु र उनका छोरा नारायण साई सहित ८ जना विरुद्ध आईपीसीको विभिन्न धारा अन्तर्गत मुद्दा दर्ता गरेको थियो ।

आसाराम बापु हाल जोधपुर जेलमा छन् । योसँगै नारायण साईविरुद्ध सुरतको अदालतमा छुट्टै मुद्दा चलिरहेको छ । सन् १९९७ देखि २००६ सम्म आसाराम र उनका छोराद्वारा सञ्चालित मोटेरा आश्रममा बलात्कृत भएको आरोप लगाउँदै दुई दिदीबहिनीले आसाराम र उनका छोराविरुद्ध उजुरी दिएकी थिइन् । कान्छी बहिनीले नारायण साई र जेठी दिदीले आसारामविरुद्ध उजुरी दिएकी थिइन् ।