काठमाडौं, १२ साउन । जारी पेरिस ओलम्पिकमा आज दुई नेपाली खेलाडीले प्रतिष्पर्धा गर्दै छन् । आज नेपाली टेबल टेनिस खेलाडी स्यान्टु श्रेष्ठले र ब्याडमिन्टन खेलाडी प्रिन्स दाहालले आफ्नो खेल खेल्दै हुनुहुन्छ । स्यान्टुले पेरिस एक्पो पोर्ट डे भर्सेल्समा नेपाली समय अनुसार राति ७ः३० बजेदेखि खेल्दै हुनुहुन्छ । स्यान्टुले पेरिस ओलम्पिकको प्रारम्भिक चरणमा सेनेगलका इब्राहिम डिएवसँग प्रतिस्पर्धा गर्दै हुनुहुन्छ ।

स्यान्टुले दक्षिण एसियाली छनोट फाइनलमा नेपालकै संयोग कपालीलाई हराउँदै ओलम्पिकमा आफ्नो स्थान सुरक्षित गर्नुभएको थियो ।

त्यस्तै नेपाली ब्याडमिन्टनका स्टार खेलाडी प्रिन्सले पेरिस ओलम्पिक २०२४ को समूह चरणमा डिफेन्डिङ च्याम्पियन भिक्टर एक्सल्सनविरुद्ध खेल्नुहुनेछ । यो खेल नेपाली समय अनुसार राती १२ः५५ बजेदेखि हुने छ । १९ वर्षीया प्रिन्स ब्याडमिन्टनमा ओलम्पिक खेल्ने पहिलो नेपाली हुँदैछन् । उहाँले यो अवसर युनिभर्सालिटी कोटामा पाउनुभएको हो । जुनियरमा विश्व नम्बर १ हुनुभएको उहाँ विश्व ब्याडमिन्टन महासंघको वरीयतामा अहिले १७२ औं स्थानमा हुनुहुन्छ ।