जनता टाइम्स

२८ आश्विन २०७६, मंगलबार ००:००

महरालाई सरकारी वकिलको कार्यालय ल्याइयो, केही बेरमा जिल्ला अदालत लगिदै


काठमाडौं, असोज २८

यौन दुर्व्यवहारको आरोपमा पक्राउ परेका निवर्तमान सभामुख तथा सांसद कृष्णबहादुर महरालाई बयानका लागि सरकारी वकिलको कार्यालयमा उपस्थित गराइएको छ । म्याद थपका लागि काठमाडौं जिल्ला अदालतमा उपस्थित गराउनु अघि महरालाई सरकारी वकिलको कार्यालयमा उपस्थित गराइएको हो ।

पौने ११ बजे महरालाई नर्भिक अस्पतालबाट सिधा वकिलको कार्यालय बबरमहलमा उपस्थित गराइएको छ । त्यहा उहालाई प्रारम्भिक चरणको सोधपुछ र बयान लिने काम हुने बताइएको छ । त्यसपछि म्याद थपका लागि जिल्ला अदालत लगिने प्रहरी स्रोतले जानकारी दिएको छ । महरा असोज १८ गते बालुवाटारस्थित सभामुखको सरकारी निवासबाटै पक्राउ परेका थिए ।

महरामाथि अनुसन्धानका लागि २० दिनको म्याद माग्ने प्रहरी र सरकारी वकिल कार्यालयको तयारी छ । यसमा महराको पक्राउ गरेको दिनदेखिको समय जोडिनेछ । महराको स्वास्थ्यमा समस्या देखिएपछि उनको नर्भिक अस्पतालमा उपचार भइरहेको छ । महरामाथि असोज १२ गते आइतबार संसद सचिवालयमै कार्यरत महिला कर्मचारी रोशनी शाहीकै कोठामा गएर यौन दुर्व्यवहार गरेको आरोप छ । महराले सोही प्रकरणमा सभामुखको पदबाट समेत राजीनामा दिएका थिए ।