जनता टाइम्स

३ कार्तिक २०७६, आईतबार ००:००

एनआरएनएको पहिलो बैठकले गर्यो यस्तो निर्णय (सूचीसहित)


काठमाडौं, कात्तिक ३

गैरआवासीय नेपाली संघ (एनआरएनए) को नवनिर्वाचित अन्तर्राष्ट्रिय समन्वय परिषद्ले श्रमिकका लागि ऐतिहासिक निर्णय गरेको छ । निर्वाचित भएपछि पहिलो पटक बसेको बैठकले मध्यपूर्वी मुलुकहरुमा रहेका नेपाली श्रमिकका लागि स्थापित श्रामक कल्याणकारी कोषका लागि रु १ करोड ६ लाख रुपैयाँ राहत रकम दिने निर्णय गरेको हो ।

संघका अध्यक्ष कुमार पन्तको प्रस्तावमा संघका नव निर्वाचित पदाधिकारी एवं सदस्यले सो रकम दिने घोषणा गरेका हुन् । सरकारले अघि सारेको भिजिट नेपाल २०२० मा सहकार्य गर्नका लागि निवर्तमान अध्यक्ष भवन भट्टको संयोजकत्वमा समिति गठन गरेको छ । यस्तै पुर्वाधार विकासका लागि रु १० अर्बको लगानी भित्र्याउने अभियान अगाडी बढाउन अध्यक्ष पन्तको संयोजकत्वमा एक समिति बनाई १ महिनाभित्र कार्ययोजना प्रस्तुत गर्न बैठकले निर्देशन दिएको छ ।

बैठकले अर्को मतदानमा विद्युतिय पद्दतीबाट प्रत्यक्ष मतदान गर्न र निशुल्क सदस्यता बारे अध्ययन गर्ने भएको छ । त्यसका लागि उपाध्यक्ष मन केसीको संयोजकत्वमा एक समिति गठन गरेको छ । महासचिव डा हेमराज शर्माको संयोजकत्वमा विशेष महाधिवेशन बोलाउने तयारी गर्ने निर्णय समेत बैठकले गरेको छ । विशेष महाधिवेशनले संस्थागत संरचना र निर्वाचन प्रणाली परिवर्तन गर्नेछ । यस्तै बैठकले संघको काठमाडौस्थित सचिवालयलाई चुस्त बनाउन डा. हेमराज शर्माको नेतृत्वमा एक समिति गठन गरेको छ। संस्थाको आर्थिक प्रतिवेदन तयार गर्न कोषाध्यक्ष महेश श्रेष्ठको संयोजकत्वमा एक समिति निर्माण गर्ने निर्णय गरेको छ । आगामी २ वर्षका लागि कार्ययोजना ररणनीति तय गर्नका लागि निकट भविष्टमा एक कार्यशालाको आयोजना गर्ने भएको छ ।

संघमा ५ विभाग

बैठकले ५ उपाध्यक्षहरुको नेतृत्वमा ५ विभाग (वैदेशिक रोजगार, परोपकारी तथा मानव कल्याण, व्यापार तथा लगानी, सीप, ज्ञान, र नवप्रवर्तन, नेपाल प्रवद्र्धन) निर्माण गर्ने र विभागमा अन्तर्राष्ट्रिय समन्वय परिषद्का सदस्यहरु र सम्बन्धित क्षेत्रका विज्ञहरुको रहने व्यवस्था गरेको छ । एनआरएनए फाउण्डेसन स्थापना गरी परोपकारका सबै कार्यक्रम यसै फाउण्डेसनमार्फत एकद्वार प्रणालीबाट गर्ने निर्णय गरेको छ । प्रथम एनआरएन विज्ञ गर्ने निर्णय गरिएको छ । क्षेत्रीय सम्मेलन मध्यपूर्वमा आयोजन गर्ने निर्णय समेत बैठकले गरेको छ ।

संरक्षक समिति गठन

बैठकले गैरआवासीय नेपाली संघको संरक्षक परिषद्को सदस्य समेत चयन गरेको छ । बैठकमा उपस्थित सम्पूर्ण पदाधिकारी र सदस्यको सहमतिमा प्रमुख संरक्षक शेष घले चयन हुनुभएको छ । यस्तै संरक्षक समितिको सदस्यहरुमा डा उपेन्द्र महतो, पूर्वअध्यक्षहरु जीवा लामिछाने, देवमान हिराचन, निवर्तमान अध्यक्ष भवन भट्ट र पूर्वसंरक्षक रामप्रताप थापा चुनिनु भएको छ ।

सल्लाहकार समिति गठन

बैठकले गैरआवासीय नेपाली संघको ११ सदस्यीय सल्लाकार समितिमा समेत गठन गरेको छ । सो समितिमा निवर्तमान उपाध्यक्ष कुल आचार्य युके, सपिला राजभण्डारी (रसिया), रामेश्वर शाह (नेपाल), टीबी कार्की (कतार), सोम सापकोटा (माल्टा), त्रिलोक गुरुङ (हङ्कङ), विश्व आदर्श पण्डित (युके), पुष्प तिमल्सिना (स्पेन), जमुना गुरुङ (अष्ट्रेलिया), एसी शेर्पा (अमेरिका) र हरिबोल भट्टराई (अमेरिका) रहनुभएको छ ।