काठमाडौं, १४ वैशाख । नेकपा एमालेका अध्यक्ष तथा प्रधानमन्त्री केपी शर्मा ओलीले आमाको मुहार धमिलो सम्झनामा आइरहेको बताउनुभएको छ । प्रत्येक वर्ष वैशाखकृष्ण पक्ष औँसीका दिनमा मनाइने आमाको मुख हेर्ने पर्वका दिन बिहान प्रधानमन्त्री ओलीले आमाप्रति हार्दिक श्रद्धा र सम्मान व्यक्त गर्नुभएको हो ।

उहाँले चार वर्षको नहुँदै मैले आमाको न्यानो काख गुमाएकाले जन्मभूमि नै आमाको प्रतिरूप बनेको बताउनुभयो । ‘मेरो स्मृतिमा आमाको अनुहार त्यति स्पष्ट छैन, किनभने चार वर्षको नहुँदै मैले आमाको न्यानो काख गुमाएँ। मेरो लागि जन्मभूमि नै आमाको प्रतिरूप बन्यो।’ ओलीले सामाजिक सञ्जाल फेसबुकमा भनेका छन्,‘आज मातातीर्थ औंसी, आमाको मुख हेर्ने दिन।

आमाको मुहार धमिलो सम्झनामा आइरहेछ। यस पावन दिनमा सम्पूर्ण आमाप्रति हार्दिक श्रद्धा र सम्मान व्यक्त गर्दछु।’ उहाँले आमाप्रतिको समर्पण र कृतज्ञताको भावना अझ प्रगाढ बनोस् भन्ने कामना गर्नुभएको छ । ओलीले भन्नुभएको छ, ‘आमा पृथ्वीको प्रत्यक्ष स्वरूप हुनुहुन्छ। सबैमा आमाप्रतिको समर्पण र कृतज्ञताको भावना अझ प्रगाढ बनोस्।’ शास्त्रमा पण्डित, आचार्य र पिताभन्दा पनि ठूली मानिएकी आमाप्रति श्रद्धा, भक्ति, सम्मान र आदर गर्ने तथा आमाबाट शुभाशीर्वाद थाप्ने दिनका रूपमा यो पर्वलाई लिइने शास्त्रीय परम्परा छ।