इतिहास अनुसार, राजा पृथ्वीनारायण शाहले नेपाल एकीकरणको क्रममा यही मन्दिरमा पाठपूजा गर्नु भएकाे थियाे । त्यसबेला रामेछापको मुगिटारका रामचन्द्र प्रसाईँले सिन्धुलीगढी युद्धका क्रममा शाहको सेनालाई द्रव्य र रासन–पानी सहयोग गर्नु भएकाे थियाे । युद्ध जितेपछि प्रसाईँको मागअनुसार पृथ्वीनारायणले महादेव मन्दिरको नाममा मुगिटारलगायत क्षेत्रका खेतबारी गुठी बनाइदिएको र त्यसको लिखत अझै सुरक्षित रहेको स्थानीय बुढापाकाले बताउँछन् ।

मन्दिरको गुठी जग्गाबाट उत्पादन हुने धानले पूजारी, गाई हेर्ने र टहलुवालाई ज्याला दिने प्रचलन छ । त्यही धानको पराल गाईलाई घाँसका रूपमा प्रयोग गरिन्छ । तर हाल पूजारी नहुँदा नियमित पूजापाठमै समस्या भएको मन्दिरका टहलुवा गोपाल माझी बताउनुहुन्छ । ‘पूजारी छैनन्, मैले नै दैनिक पूजा गर्ने गरेको छु’ उहाँले भन्नुभयाे।

 दुई वर्षअघि पुरातत्व विभागले मन्दिरलाई पुरातात्त्विक हिसाबले पुनर्निर्माण गरेको भए पनि मन्दिरसँगै रहेको कुटी र पाटी जिर्ण अवस्थामा छन् । तर तिनको मर्मत–सम्भारमा सम्बन्धित निकायको ध्यान पुगेको छैन ।

यसैबीच, त्रिवेणी मन्दिर नजिकै सुनकोशी नदीमा सुनकोशी–मरिण डाइभर्सनको ड्याम निर्माण हुँदैछ । ड्याम बनेपछि त्यहाँ पर्यटकको चहलपहल बढ्ने भएकाले मन्दिरको महत्व थप उच्च हुने अनुमान गरिएको छ । तर यसको व्यवस्थापन र संरक्षणमा समयमै ध्यान नपुर्याइए यो स्थलको ऐतिहासिक र धार्मिक गरिमा खस्किने चिन्ता स्थानीयले व्यक्त गरेका छन् ।