मोरङ, फागुन १ । चुनावको मिति नजिकिँदै जाँदा पूर्व मोरङमा नेपाली कम्युनिष्ट पार्टी (नेकपा) का प्रभावशाली नेता नेकपा एमाले प्रवेश गरेका छन ।

तत्कालिन नेकपा (माओवादी केन्द्र) का उर्लाबारीका प्रभावशाली स्थानीय नेता मिलन दाहाल बिहीवार नेकपा एमालेमा प्रवेश गर्नुभएको हो । दाहाललाई एमालेले औपचारिक कार्यक्रममार्फत पार्टीमा स्वागत गरेको छ।

दाहाललाई एमाले कोशी प्रदेश कमिटी अध्यक्ष तथा मोरङ–१ का उम्मेदवार घनश्याम खतिवडा लगायतका नेताहरूले खादा तथा टीका लगाएर स्वागत गर्नुभएको छ । पार्टी प्रवेशपछि दाहालले देश र जनताको हितका लागि एमालेमार्फत सक्रिय भूमिका निर्वाह गर्ने प्रतिबद्धता जनाउनु भयो ।

दाहाल गत स्थानीय तह निर्वाचनमा उर्लाबारीमा माओवादी केन्द्रका तर्फबाट वडाध्यक्ष पदका उम्मेदवारमध्ये सर्वाधिक मत ल्याउने उम्मेदवार हुनुहुन्छ । उहाँको एमाले प्रवेशलाई स्थानीय राजनीतिक वृत्तमा अर्थपूर्ण घटनाका रूपमा हेरिएको छ।

एमालेका स्थानीय नेताहरूले दाहालजस्तो जनाधार भएका नेताको आगमनले उर्लाबारी क्षेत्रमा पार्टी संगठन अझ मजबुत हुने विश्वास व्यक्त गरेका छन्।