काठमाडौं, असोज ११

नरदेवीस्थित आयुर्वेद चिकित्सालय (अस्पताल) ले काठमाडौं उपत्यकामा कोरोना संक्रमणमा कमी नआएको भन्दै रोग प्रतिरोधी क्षमता बढाउन निःशुल्क चुर्ण वितरण गर्दै आएको छ । उपत्यकाका केन्द्रीय अस्पतालहरु संक्रमितको उपचार तथा व्यवस्थापनमा खटिरहेका छन् । तर नरदेवीले भने संक्रमण नै नहोस वा भईहाले पनि छिटो निको होस् भन्ने अभियानमा जुटेको जनाएको छ ।

एक महिनाअघि देखि आम सर्वसाधारणका लागि निःशुल्क चुर्ण वितरण गर्दै आएको हो । हाल औषधालयमा आएर दैनिक तीन देखि चार सय जनाले निःशुल्क रुपमा चुर्ण लिएर जाने गर्दछन् । चिकित्सालयका निर्देशक डा. प्रदीप केसीका अनुसार गत ११ भदौदेखि आमसर्वसाधारणका लागि निःशुल्क रुपमा जेष्ठवासादि, गुडूची र यष्ठिमधु मिसाइ तयार पारि चुर्ण वितरण गरिएको हो । चुर्णमा १२ वटा आयुर्वेदिक जडिवुटिहरुको प्रयोग भएको छ ।

आफूहरुले उक्त चुर्ण कोरोनाविरुद्ध नै हो भनेर नतोकेको तर भाइरसजन्य संक्रमणविरुद्ध लड्न र रोकथामको लागि नियमित सेवन प्रयोग गर्न सकिने छ । संक्रमण घटाउने र रोग प्रतिरोधी क्षमता बढाउँने भएकाले यसको प्रयोग फाइदाजनक हुने देखेर वितरण गरेको डा. केसीले बताउनुभयो । पछिल्लो समय अस्पतालमा आउने आम सर्वसाधारण बाहेक, प्रहरी, सेना, क्लव, टोल सुधार समिति जस्ता समुह र समुदायस्तरमा वितरण गर्न समेत यि जडिबुटि समिश्रणयुक्त चुर्णको माग हुन थालेको छ ।